ПАЛМ-БИЧ, 2 ноябрь. /“Дунё” АА/. АҚШнинг Флорида штатида “Learjet 60” хусусий самолёти аҳоли турар жойлари жойлашган ҳудуддаги кўчага қулаб тушиши натижасида бортдаги тўққиз кишининг барчаси ҳалок бўлди, деб хабар бермоқда “Дунё” АА мухбири “CNN” телеканалига таяниб.

Ҳалокат 1 ноябрь куни маҳаллий вақт билан соат 12:50 атрофида (Тошкент вақти билан 22:50 да) Палм-Бич округининг Дональд Трампга тегишли Мар-а-Лаго қароргоҳидан тахминан 14 км узоқликдаги Крестхейвен туманида содир бўлган.

Ҳодисадан сўнг эълон қилинган тасвирларда йўл ўртасида пайдо бўлган чуқур, ёнғин ўчоқлари ва ҳаво кемасининг ҳар томонга сочилиб кетган парчалари акс этган.

АҚШ Федерал фуқаро авиацияси бошқармаси (FAA) маълумотларига кўра, самолёт Техас штатидаги Остин шаҳридан ҳавога кўтарилиб, Багама ороллари томон йўл олган.

Флорида губернатори Рон Десантис ҳалокат видеоёзувига изоҳ берар экан, қулаётган самолётни ракетага қиёслади. Унинг сўзларига кўра, ҳаво кемаси ерга деярли тик ҳолатда урилиб, кучли портлашни келтириб чиқарган.

Расмийларнинг дастлабки маълумотларига кўра, ерда ҳалок бўлганлар ва жабрланганлар йўқ.

Ҳодиса рўй берган ҳудудда момақалдироқ ва кучли ёмғир кузатилган.

Қайд этилишича, Дональд Трамп фалокатдан тахминан бир соат олдин яқин атрофдаги аэропортдан “Air Force One” бортида учиб кетган.

 “The Wall Street Journal” сурати