ТОШКЕНТ, 31 июль. /“Дунё” АА/. Мамлакатимизда “Uzbek Gift Contest” республика туристик эсдалик совғалари танлови бошланди, деб хабар бермоқда “Дунё” АА мухбири.

Танлов Туризм қўмитаси томонидан “Ҳунарманд” уюшмаси ва Бадиий академия билан ҳамкорликда ташкил этилган бўлиб, миллий ҳунармандчилик санъатини туристлар учун замонавий эсдалик совғасига айлантиришга қаратилган.

Биринчи босқич 24 июлдан 16 августга қадар дизайнерлар ўртасида ўтказилмоқда. Иштирокчилар миллий ҳунармандчиликнинг 25 та йўналиши бўйича туристик эсдалик совғаларининг эскизлари ва ғояларини тақдим этадилар.

Иккинчи босқич 20 августдан 20 сентябрга қадар ҳунармандлар ўртасида бўлиб ўтади. Ушбу босқичда биринчи босқичда ғолиб бўлган дизайнлар асосида тайёр буюмлар яратилади. Баҳолашда буюмнинг сифати, миллий колорити, ихчамлиги ва ҳамёнбоплиги асосий мезон бўлади.

Ҳар бир босқич якунлари бўйича ғолиблар аниқланади. Совринли ўринларни эгаллаган ҳар бир иштирокчи 5 миллион сўм миқдорида пул мукофоти билан тақдирланади.