ЛОНДОН, 20 июнь. /“Дунё” АА/. Британиянинг “The Fintech Times” нашрида “TBC Uzbekistan” компанияси томонидан кичик ва ўрта бизнес корхоналари учун иш ҳақини ҳисоблашнинг тўлиқ рақамли тизими жорий этилгани хусусида мақола эълон қилинди, деб хабар бермоқда “Дунё” АА мухбири.

Мақолада қайд этилишича, янги хизмат корпоратив мижозлар учун Ўзбекистондаги биринчи тўлиқ рақамли молиявий экотизим ҳисобланган “TBC Business” платформасига интеграция қилинган. 2024 йил декабрь ойида ишга туширилган мазкур платформа бугунги кунга қадар мамлакат бўйлаб 30 мингдан ортиқ корхонани жалб этган.

Янги хизмат компанияларга иш ҳақини банк муассасаларининг иш жадвалига боғланмаган ҳолда, кеча-ю кундуз тўлаш имконини беради.

Автоматлаштирилган тизим туфайли иш берувчилар куннинг исталган вақтида тўловларни амалга оширишлари мумкин, ходимлар эса иш ҳақини “TBC Salom” дебет карталарига деярли бир зумда, анъанавий банк жараёнларига хос кечикишларсиз олади.

Мазкур хизмат “TBC Business” экотизимининг таркибий қисми бўлиб, унга кичик ва ўрта бизнесни молиялаштириш дастурлари, корпоратив молияни бошқариш учун мобил илова ҳамда бизнес жараёнларини автоматлаштириш ечимлари киради. Платформа имкониятлари чакана савдо учун дастурий таъминот ишлаб чиқувчи “BILLZ” компаниясининг қўшиб олиниши орқали янада кенгайтирилган.

“TBC Uzbekistan” бош директори Ника Курдианининг таъкидлашича, янги хизмат тадбиркорлар учун молиявий операцияларни соддалаштириш ва кундалик жараёнларни қўшимча харажатларсиз автоматлаштиришга қаратилган.

Тизим, шунингдек, компания ходимларининг рақамли банк хизматларидан фойдаланишига имконият яратади. “TBC Salom” дебет картаси “TBC UZ” мобил иловаси орқали тўлиқ онлайн тарзда расмийлаштирилади. Фойдаланувчилар маблағлар қолдиғидан фоиз олиш, кешбек дастурларидан фойдаланиш ҳамда жисмоний шахслар ўртасида пул ўтказмаларини комиссиясиз амалга ошириш имконига эга.

Компания маълумотларига кўра, бугунги кунда “TBC Uzbekistan” экотизими 6 миллионга яқин ойлик фаол фойдаланувчиларга эга. Платформа ривожи сунъий интеллект асосидаги инфратузилмалар, жумладан, “Lola” виртуал ёрдамчиси орқали қўллаб-қувватланмоқда.

Янги хизматнинг ишга туширилиши Ўзбекистонда рақамли банкингни янада ривожлантириш ва тадбиркорлар учун молиявий хизматлар кўламини кенгайтириш йўлидаги муҳим қадам бўлди.