БУДАПЕШТ, 10 июль. /“Дунё” АА/. Беларуснинг Венгриядаги элчиси Владимир Улахович “Дунё” ААга Ўзбекистон Президенти Шавкат Мирзиёевнинг Минскга амалга оширган расмий ташрифи юзасидан ўз фикр-мулоҳазаларини билдирди:

– Ўзбекистон Президенти Шавкат Мирзиёевнинг Беларусга ташрифи, шубҳасиз, икки давлат ўртасидаги муносабатлар тарихи ва тараққиётидаги муҳим воқеалардан биридир. Беларусда олий даражадаги музокаралар Минск ва Тошкент ўртасидаги стратегик шерикликда янги саҳифа очишини англаган ҳолда Ўзбекистон етакчисининг ташрифи алоҳида эътибор билан қарши олинди.

Ташрифга тайёргарлик юқори даражада олиб борилди. Бу Беларусь Бош вазири Александр Турчиннинг Ўзбекистон Президенти билан Тошкентда бўлиб ўтган учрашуви ҳамда V Тошкент халқаро инвестиция форуми доирасидаги музокараларнинг асосий мавзуларидан бирига айланди.

Давлатларимиз раҳбарларининг Минскдаги учрашуви арафасида Бош вазир ўринбосари Юрий Шулейко билан Ўзбекистон инвестициялар, саноат ва савдо вазири Лазиз Қудратов ўртасида музокаралар бўлиб ўтди. Унда томонлар кун тартибидаги асосий масалалар юзасидан ўз позицияларини баён этди. Бундай изчил тайёргарлик аниқ натижаларга эришиш ва кенг кўламли қўшма лойиҳаларни амалга оширишдан ҳар икки томон бирдек манфаатдор эканини кўрсатади.

Музокаралар чоғида савдо-иқтисодий ҳамкорликни янада мустаҳкамлаш, саноат кооперацияси ва ҳудудлараро алоқаларни ривожлантиришга алоҳида эътибор қаратилди. Беларусь жорий йилнинг ўзида Ўзбекистон билан товар айирбошлаш ҳажмини бир миллиард долларга етказишни, 2030 йилга бориб эса, бу кўрсаткични икки баробарга оширишни режалаштирмоқда.

Бугунги кунда Беларусь техникаси, фармацевтика ва гўшт-сут маҳсулотларига Ўзбекистонда талаб юқори. Тракторларни биргаликда ишлаб чиқариш муваффақиятли ривожланмоқда, ўзбек мева-сабзавотлари ва тўқимачилик маҳсулотлари эса Беларусь бозорида ўз ўрнини эгаллаган.

Менга Беларусь Президенти Александр Лукашенконинг Тошкентга ва Ўзбекистон етакчиси Шавкат Мирзиёевнинг Минскка ташрифларида иштирок этиш шарафи насиб этган. Учрашувлар қалин дўстлик ва ўзаро ҳурмат муҳитида ўтган, конструктив, стратегик ва келажакка йўналтирилган мулоқот ҳамда музокаралар ташкил этилган.

Айтишим лозимки, Беларусда Президент Шавкат Мирзиёевга Ўзбекистоннинг атоқли сиёсий етакчиси ва буюк ватанпарвари сифатида чуқур эҳтиром билан муносабатда бўлишади.

Фикримча, бу ташриф – кўп йиллик ўзаро ҳурмат, ишонч ва биргаликда ривожланиш истаги билан бирлашган дўст давлатлар ва қардош халқларнинг, замонамизнинг икки йирик сиёсий раҳбарининг чинакам тарихий учрашувидир.