МИНСК, 10 июль. /“Дунё” АА/. Беларусь оммавий ахборот воситалари Ўзбекистон Президенти Шавкат Мирзиёевнинг Беларусга расмий ташрифини кенг ёритиб, икки томонлама стратегик шерикликнинг жадал ривожланаётгани, иқтисодий ҳамкорликнинг кенгаяётгани ва икки мамлакат ўртасидаги гуманитар алоқаларнинг мустаҳкамланаётганини таъкидламоқда, деб хабар бермоқда “Дунё” АА мухбири.

Беларусь ОАВлари 6–8 июль кунлари Минск шаҳрида бўлиб ўтган Беларусь ва Ўзбекистон ҳудудларининг III форумига алоҳида эътибор қаратди. “СБ. Беларусь сегодня”, “Минск-Новости” каби етакчи нашрлар ва МДҲ Ижроия қўмитаси портали ушбу тадбир эришилган келишувлардан аниқ қўшма лойиҳаларни амалга оширишга ўтиш учун муҳим майдон бўлганини таъкидлади. Нашрларда муҳокамаларнинг асосий йўналишлари саноат кооперацияси, агросаноат мажмуаси, савдо, логистика, тиббиёт, туризм ва гуманитар ҳамкорлик бўлгани алоҳида қайд этилган.

Беларуснинг “БЕЛТА” телеграф агентлиги, МДҲ Ижроия қўмитасининг интернет портали ва бошқа ахборот ресурслари ҳам икки мамлакат саноат кооперациясининг ривожланишини ёритмоқда. Нашрларда Савдо-иқтисодий ҳамкорлик бўйича ҳукуматлараро комиссиянинг, машинасозлик, қишлоқ хўжалиги техникасини ишлаб чиқариш ва бошқа тармоқлардаги қўшма лойиҳаларнинг ўрни қайд этилган. Бунга мисол сифатида Минск трактор заводи билан ҳамкорликда Нурафшон шаҳрида қишлоқ хўжалиги техникаси ишлаб чиқариш йўлга қўйилгани, кабель маҳсулотлари ва бошқа саноат йўналишларидаги лойиҳалар келтирилган.

Нашрлар агросаноат соҳасидаги ўзаро ҳамкорликка ҳам алоҳида эътибор қаратди. “БЕЛТА” агентлиги 2030 йилгача озиқ-овқат маҳсулотлари ва қишлоқ хўжалиги хомашёси бўйича ўзаро товар айирбошлаш ҳажмини 1 миллиард долларга етказишга қаратилган Беларусь ва Ўзбекистоннинг қўшма ишлар режаси тасдиқланганини маълум қилган.

Беларусь ОАВлари ҳудудлараро алоқаларнинг ривожланишига ҳам эътибор қаратди. “СБ. Беларусь сегодня” ва “БЕЛТА” нашрлари Фарғона, Навоий, Хоразм ва Жиззах вилоятлари делегацияларининг Беларусь ҳудудларига ташрифлари ҳақида хабар берди. Икки мамлакат вакиллари қишлоқ хўжалиги, саноат, қайта ишлаш, техника ва озиқ-овқат саноати маҳсулотларини етказиб бериш, қўшма инвестиция лойиҳаларини амалга ошириш бўйича ҳамкорлик истиқболларини муҳокама қилди.

“БЕЛТА” агентлиги ва мамлакатнинг энг қадимий нашри бўлган “Звязда” газетаси Беларусь ва Ўзбекистоннинг замонавий шериклиги савдо муносабатлари доирасидан чиқиб, янги авлод технологик ҳамкорлиги тусини олаётганини таъкидлаган. Нашрлар икки халқ дўстлигининг тарихий асослари, жумладан, Иккинчи жаҳон уруши йилларидаги ўзаро ёрдамга ва 1966 йилги зилзиладан сўнг Тошкентни тиклашда беларусьлик мутахассисларнинг иштирокига эътибор қаратган.

Беларусь ОАВларида туризм соҳасидаги ҳамкорлик мавзуси муҳим ўрин эгаллади. “БЕЛТА” агентлиги, “Однако, жизнь!” журнали ва бошқа оммабоп интернет-ресурслар Ўзбекистонга келаётган беларуслик сайёҳлар сони ортиб бораётганини хабар қилди.

Маълумотларга кўра, 2025 йилда мамлакатимизга 32 мингдан ортиқ Беларусь фуқароси ташриф буюрган бўлса, 2026 йилнинг январь–май ойларида бу кўрсаткич 14 минг кишидан ошган. Нашрлар Ўзбекистоннинг туризм таклифлари кенгаяётгани, маданий-маърифий, гастрономик, экологик ва бошқа йўналишлар ривожланаётгани, шунингдек, икки мамлакат сайёҳлик компаниялари ўртасидаги алоқалар фаоллашаётганини қайд этди.

Беларусь ОАВлари икки томонлама муносабатларнинг гуманитар жиҳатларини ҳам ёритмоқда. “Беларусь 24” телеканали ва “Минск-Новости” агентлиги Минскда Ўзбекистон маданияти кунлари ҳамда Ўзбек киноси кунлари ўтказилаётгани ҳақида хабар берди. Тадбирлар доирасида Беларусь жамоатчилиги Ўзбекистон санъати, кинематографияси, халқ ҳунармандчилиги ва маданий анъаналари билан танишмоқда.

Беларуснинг етакчи босма ва электрон нашрлари саммит якунларини сарҳисоб қилар экан, икки мамлакат етакчиларининг ўзаро ҳурмат, ишонч ва бир-бирининг манфаатларини ҳисобга олиш тамойилларига асосланган стратегик шерикликни янада мустаҳкамлаш борасидаги қатъий интилишлари ҳақида тўхталиб ўтди. Олий даражада эришилган Ўзбекистон–Беларусь келишувлари, имзоланган ҳужжатлар ва белгиланган амалий чора-тадбирлар савдо-иқтисодий, инвестициявий, саноат, илмий-техник, маданий-гуманитар ва ҳудудлараро соҳаларда ўзаро манфаатли ҳамкорликни ривожлантиришга қўшимча туртки беришга қаратилгани қайд этилган.