СИНГАПУР, 16 май. /“Дунё” АА/. Сингапурда фаолият юритувчи таниқли немис молиявий таҳлилчиси ва инвестори Райнер-Михаэль Прайс “DFO Singapore” нашрида Ўзбекистоннинг сармоявий имконияти ҳамда ҳукуматнинг хорижий инвестицияларни жалб этиш борасидаги изчил чора-тадбирларини юқори баҳолади, деб хабар бермоқда “Дунё” АА мухбири.

Мутахассиснинг фикрича, Ўзбекистон Миллий инвестиция жамғармасининг (“UZNIF”) Лондон фонд биржасида листингга чиқиши мамлакат иқтисодиёти ривожида муҳим босқич бўлди. Ушбу қадам нафақат Ўзбекистоннинг халқаро молия бозорларига кириб боришини англатади, балки хорижий инвесторлар учун Марказий Осиё минтақасида фаолият юритишга янги имкониятлар яратган.

“UZNIF” шунчаки алоҳида бир компания эмас, балки Ўзбекистон иқтисодиётининг турли тармоқларига сармоя киритиш имконини берадиган инвестиция жамғармасидир.

Жамғарма банк, энергетика, транспорт, телекоммуникация соҳалари ва саноат корхоналарида стратегик улушларга эгалик қилади. Бу орқали инвесторлар битта компаниядан эмас, балки бутун мамлакатдаги иқтисодий ислоҳотлар ва модернизация жараёнидан фойда кўриш имкониятига эга бўлади.

Таҳлилчининг қайд этишича, “UZNIF” акцияларининг бирламчи оммавий жойлаштируви инвесторларда катта қизиқиш уйғотган. Хусусан, Лондон фонд биржасидаги листинг вақтида битта глобал депозитар тилхатнинг қиймати 25 доллар этиб белгиланган ва жалб қилинган маблағларнинг умумий ҳажми 603,6 миллион долларни ташкил этган.

Бундан ташқари, “Franklin Templeton”, “BlackRock”, “Redwheel” каби йирик халқаро инвесторларнинг иштироки жамғармага бўлган ишонч даражаси юқори эканидан далолат беради. Бу ўз навбатида. Ўзбекистоннинг халқаро молиявий нуфузи мустаҳкамланиб бораётганини кўрсатади.