ҚОҲИРА, 18 октябрь. /"Дунё" АА/. Ўзбекистон Вазирлар Маҳкамасининг Давлат тилини ривожлантириш департаменти ва Ўзбек тилини ривожлантириш жамғармаси томонидан ўтказилган "Жонажон ўзбек тилим" республика танловида мамлакатимизнинг Мисрдаги элчихонаси ходими Отабек Алимов томонидан тайёрланган дарслик ғолиб деб топилди, деб хабар қилмоқда "Дунё" АА мухбири.

Ушбу нашр танловнинг "Ўзбек тилини халқаро миқёсда оммалаштиришга хизмат қилаётган энг яхши амалий иш" йўналиши бўйича энг илғор лойиҳа сифатида эътироф этилди.

Қайд этиш жоизки, Қоҳира университетида ўзбек тилини ўрганаётган талабалар талабига кўра, дипломат ташаббуси билан инглиз тилидаги "Uzbek Language. Complete Self-Study Guide in 22 Lessons" номли илмий-амалий қўлланма тайёрланди ва элчихона томонидан нашр этилди.

Дарслик Amazon платформасида электрон ва рангли босма кўринишида, шунингдек, Google Books ва Google Play орқали илова шаклида ҳам тақдим этилган.

Қўлланманинг рус тилидаги таржимаси – "Узбекский язык: Полный курс за 22 урока" – "Литрес" ва "OZON" каби йирик онлайн китоб дўконларида сотувга чиқарилган. Китобни араб ва бошқа тилларга ҳам таржима қилиш режалаштирилмоқда. Мазкур лойиҳа ўзбек тилининг халқаро нуфузини ошириш ва унинг ўқитилиш географиясини кенгайтиришга хизмат қилмоқда.