ТОШКЕНТ, 15 октябрь. "Дунё" АА/. Олий Мажлис Сенати Раисининг биринчи ўринбосари Содиқ Сафоев бошчилигидаги Ўзбекистон парламенти делегацияси бугун Татаристон Республикасининг Қозон шаҳрига ташриф буюрди, деб хабар қилмоқда "Дунё" АА мухбири.

Парламент юқори палатаси маълумотига кўра, делегация аъзолари Ўзбекистон Олий Мажлиси Сенати ва Россия Федерал Мажлиси Федерация Кенгаши ўртасидаги ҳамкорлик бўйича комиссиянинг ўнинчи мажлисида иштирок этади.

Мажлисда икки мамлакат парламентлари ўртасидаги ўзаро ҳамкорликни янада ривожлантириш, савдо-иқтисодий, таълим, қишлоқ хўжалиги, туризм ва гуманитар соҳалардаги алоқаларни кенгайтириш масалалари муҳокама қилинади.

Шунингдек, тадбир доирасида Ўзбекистон Республикаси Олий Мажлиси Сенати делегациясининг Россия Федерацияси Федерал Мажлиси Федерация Кенгаши вакиллари ва Татаристон Республикаси Туризм давлат қўмитаси раҳбарлари билан учрашувларини ўтказиш ҳамда Татаристон Республикасининг замонавий технологик инфратузилмалари билан танишиш кўзда тутилган.