ТОШКЕНТ, 23 апрель. /"Дунё" АА/. Ўзбекистон Президенти Шавкат Мирзиёев Кашмир ҳудудида содир бўлган террорчилик ҳаракати оқибатида кўплаб инсонлар нобуд бўлгани ва жиддий жароҳат олгани муносабати билан Ҳиндистон Президенти Драупади Мурму ва Бош вазири Нарендра Модига таъзия йўллади, деб хабар қилмоқда "Дунё" АА мухбири.

"Давлатимиз раҳбари қурбонларнинг оила аъзолари ва яқинларига, бутун Ҳиндистон халқига самимий ҳамдардлик изҳор этиб, жароҳатланганлар тез фурсатда соғайиб кетишини тилади", – деб ёзди Ўзбекистон Президентининг матбуот котиби Шерзод Асадов ўзининг telegram каналида.

ВВС маълумотига кўра, 22 апрель куни қуролланган шахслар Кашмирнинг Ҳиндистон қисмида бир гуруҳ сайёҳларга қарата ўт очган. Ҳалок бўлганлар ва яраланганларнинг аниқ сони ҳозирча маълум эмас. Оммавий ахборот воситаларининг ёзишича, 20 дан ортиқ киши ҳалок бўлган ҳамда ўнлаб одамлар яраланган.

ВВС сайтидан олинган сурат