ТОШКЕНТ, 27 апрель. /"Дунё" АА/. Ўзбекистон Президенти Шавкат Мирзиёев бугун Эроннинг Бандар-Аббос шаҳридаги Шаҳид-Ражоий порти ҳудудида рўй берган портлаш оқибатида кўплаб инсонлар ҳалок бўлгани ва жиддий жароҳат олгани, катта талафотлар кўрилгани муносабати билан Президент Масъуд Пезешкиёнга таъзия мактуби йўллади, деб хабар қилмоқда "Дунё" АА мухбири.

Бу ҳақда давлатимиз раҳбарининг матбуот котиби Шерзод Асадов ўзининг telegram-каналида ёзди.

"Давлатимиз раҳбари вафот этганларнинг яқинларига сабр-тоқат ва бардамлик, жароҳат олганлар тез фурсатда шифо топишини тилади", - дейилади хабарда.

"The Associated Press" ахборот агентлиги маълумотига кўра, 26 апрель куни Эроннинг жанубидаги Бандар-Аббос шаҳрида жойлашган Шаҳид- Ражоий портида кучли портлаш юз берган. Натижада камида 18 киши ҳалок бўлган ва 800 дан ортиқ одам жароҳатланган.

 "IRNA News Agency"сайтидан олинган сурат