БАНГКОК, 23 август. /"Дунё" АА/. Таиланд пойтахти Бангкок шаҳрида ўтказилган "SIMSO-2025 Final round in Bangkok, Thailand" Сиам халқаро математика олимпиадасининг финал босқичи бўлиб ўтди, деб хабар қилмоқда "Дунё" АА мухбири.

Мазкур олимпиада 2018 йилдан буён ICE халқаро таълим ташкилоти томонидан ўтказилиб келинмоқда. Олимпиада икки босқичдан иборат бўлиб, биринчи маҳаллий босқичда Ўзбекистондан 300 нафарга яқин ўқувчи иштирок этди ва улардан 30 нафари финал босқичига йўлланмани қўлга киритди.

Олимпиаданинг финал босқичида қатнашган Ўзбекистон ўқувчилари 20 га яқин давлатдан ташриф буюрган билимдонлар билан ўзаро беллашиб, 5 та олтин, 7 та кумуш, 7 та бронза медалини қўлга киритди.

Билимлар беллашуви якунида юртимиздан вакилларига Ўзбекистон Бош консулхонаси номидан ташаккурнома ва эсдалик совғалари топширилди.