САНКТ-ПЕТЕРБУРГ, 16 июнь. /"Дунё АА/. Футбол бўйича Ўзбекистон миллий терма жамоасининг Жаҳон чемпионати йўлланмасини қўлга киритгани муносабати билан ватандошлар ўртасида мини-футбол турнири ўтказилди, деб хабар қилмоқда "Дунё" АА мухбири.

Санкт-Петербург шаҳридаги "ФОК Доблести" спорт майдонида бўлиб ўтган турнир мамлакатимизнинг Санкт-Петербургдаги Бош консулхонаси, Ўзбекистон Миграцияси агентлиги, "Uzbekistan Airways" авиакомпанияси ваколатхонаси ва Санкт-Петербург шаҳри маъмурияти ҳамкорлигида ташкил этилди.

Мусобақада "КМЗ", МЧЖ, "Миру-Строй" МЧЖ, "Армаган", "Фабрика-78", "Морозка", "KING FISH", "Балтийский берег" ва бошқа корхоналарда вақтинча ишлаётган юртдошларимиздан тузилган саккизта жамоа ўзаро куч синашди.

Турнир финалида "Идеал" ва "КМЗ" жамоалари ўзаро беллашди. Ҳал қилувчи баҳсда "Идеал" жамоаси "КМЗ" устидан 5:3 ҳисобида ғалаба қозониб, турнир бош совринни қўлга киритди.

Тақдирлаш маросимида сўзга чиққан юртдошлармиз, барча ўйинлар муросасиз курашлар остида ва кўтаринки кайфиятда бўлиб ўтганини таъкидладилар. Шунингдек, улар беллашувлар нафақат спорт руҳида, балки дўстона муҳитда ўтганини ва бу каби тадбирлар Ватандан узоқда бўлсада, халқимизга хос бағрикенглик ва бирдамликни намоён этишини қайд этдилар.

Турнир якунида ғолиб жамоаларга кубок ва эсдалик совғалари топширилди.