ЛОНДОН, 12 март. /"Дунё" АА/. Ўзбекистон элчиси Равшан Усманов Британиянинг "NEU Professionals" рекрутинг компанияси директори Эдита Озбек билан онлайн тарзда учрашди, деб хабар бермоқда "Дунё" АА мухбири.

Учрашув давомида мамлакатмизда меҳнат миграцияси соҳасида амалга оширилган ислоҳотлар, хорижда ватандошларимизнинг ҳуқуқ ва манфаатларини ҳимоя қилишга қаратилган Президент қарорлари ҳамда яратилган қулайликлар тўғрисида батафсил маълумот берилди.

Ўз навбатида, Эдита Озбек миграция соҳасида ҳамкорликни йўлга қўйишдан мамнун эканлигини билдириб, мамлакатимиздаги тиббиёт ходимларини Британияда иш билан таъминлашга тайёрлигини айтиб ўтди. Шунингдек, юртдошларимиз учун мутахассислик даражасида инглиз тили курсларини ташкил этиш таъкидланди.

Музокаралар натижасида мамлакатимизнинг соҳавий вазирлик ва идоралари билан манзилли музокаралар ташкил этиш учун мазкур рекрутинг агентлиги ҳамда "Қироллик ҳамширалик коллежи" (Royal College of Nursing), "Ковентри университети" (Coventry University), "Мутахассис тил курслари" (Specialist Language Course), виза ва иммиграция вакилларидан иборат делегацияни 20-23 апрель кунлари Ўзбекистонга юбориш бўйича келишувга эришилди.

Маълумот учун, "NEU Professionals" 2013 йилда ташкил топган бўлиб, хориждан Англия ва Уэлс бўйлаб кадрларни етказиб бериш билан шуғулланади.