ШЕНЬЧЖЕНЬ, 13 ноябрь. /“Дунё” АА/. Президентлар Дональд Трамп, Владимир Путин ва Си Цзинпин 18–19 ноябрь кунлари Шеньчжень шаҳрида бўлиб ўтадиган Осиё-Тинч океани иқтисодий ҳамкорлиги (ОТИҲ) саммити доирасида учрашиши мумкин, деб хабар бермоқда “Дунё” АА мухбири “Reuters” агентлигига таяниб.

Саммитга ХХР Раиси Си Цзинпин раислик қилади. Тадбирда АҚШ ва Россия президентларидан ташқари Филиппин, Канада, Австралия, Мексика, Индонезия, Малайзия, Жанубий Корея ва Вьетнам етакчиларининг ҳам иштирок этиши кутилмоқда.

Айниқса, уч давлат раҳбарларининг эҳтимолий музокараларига катта эътибор қаратилмоқда. Музокаралар чоғида ядровий қуролсизланиш, Украинадаги можаро, АҚШ–Хитой савдо алоқалари, сунъий интеллект, Яқин Шарқдаги вазият ва унинг жаҳон иқтисодиётига таъсири каби масалалар муҳокама қилиниши мумкин.

Россия президентининг ёрдамчиси Юрий Ушаков Россия ва АҚШ етакчилари Украинадаги можарони муҳокама қилиш учун Хитойнинг Шеньчжень шаҳрида учрашишини тасдиқлади. Уларнинг Си Цзинпин билан уч томонлама учрашув ўтказиш-ўтказмаслиги эса ҳозирча номаълум.

Эътиборлиси, ҳар учала давлат етакчиси 2017 йилда Вьетнамнинг Дананг шаҳрида ўтказилган ОТИҲ саммитида биргаликда қатнашган ва иштирокчиларнинг умумий суратига тушган эди. Бироқ ўшанда улар ўртасида уч томонлама музокаралар бўлиб ўтмаган.

ОТИҲ – 1989 йилда Австралиянинг Канберра шаҳрида ташкил этилган халқаро иқтисодий форум ҳисобланади. У Осиё-Тинч океани минтақасидаги 21 иқтисодиётни бирлаштириб, савдо, инвестициялар, иқтисодий ўсиш ва минтақавий ҳамкорликни ривожлантиришга қаратилган. Ушбу бирлашма аъзолари ҳиссасига глобал ЯИМнинг қарийб 62 фоизи ва жаҳон савдосининг деярли ярми тўғри келади.

Шеньчжендаги саммит Хитой мезбонлик қилаётган шундай нуфуздаги учинчи тадбир бўлади. Бунгача ОТИҲ етакчиларининг учрашувлари 2001 йилда Шанхайда ва 2014 йилда Пекинда бўлиб ўтган эди.

“Reuters” агентлиги сурати