НЬЮ-ЙОРК, 18 июнь. /"Дунё" АА/. "Эл-юрт умиди" жамғармаси ижрочи директори Гулноза Исмоилова АҚШга амалий сафари давомида ушбу мамлакат олий таълим муассасаларида таҳсил олаётган жамғарма стипендиатлари билан учрашди, деб хабар қилмоқда "Дунё"АА мухбири.

Ўзбекистоннинг Нью-Йорк шаҳридаги Бош консулхонасида кечган мулоқот аввалида жамғарманинг жорий фаолият йўналишлари, унинг келгусидаги ривожланиш истиқболлари ва хорижда малакали миллий кадрларни тайёрлаш бўйича белгиланган вазифалар ҳақида сўзлаб берилди.

Жамғарманинг Ўзбекистонда амалга оширилаётган ислоҳотлар, замонавий билим ва кўникмаларга эга мутахассисларни тайёрлашнинг барқарор тизимини шакллантириш контекстидаги устувор йўналишларига алоҳида эътибор қаратилди.

Стипендиатлар ўз чиқишларида, жамғарманинг янги авлод талабаларини қўллаб-қувватлаш бўйича дастурларини амалга оширишда фаол иштирок этишга тайёр эканликларини билдирдилар.