ЛОНДОН, 18 сентябрь. /“Дунё” АА/. Ўзбекистон Атом энергияси агентлиги раҳбари Азим Ахмедхаджаев бошчилигидаги делегация Бутунжаҳон ядро ассоциациясининг 51-симпозиумида иштирок этди, деб хабар бермоқда “Дунё” АА мухбири.

Лондонда бўлиб ўтган анжуманда мамлакатимизнинг атом энергетикасини ривожлантириш йўллари ва ўзига хос интеграциялашган АЭС лойиҳаси халқаро жамоатчиликка таништирилди.

Ушбу лойиҳа катта қувватли ВВЭР-1000 энергоблоклари ва кичик қувватли РИТМ-200Н реакторларини ўзаро бирлаштиришни назарда тутади ҳамда республикамизнинг энергетика хавфсизлигини мустаҳкамлашга қаратилган.

Халқаро экспертлар Ўзбекистоннинг бу борадаги ёндашувини юқори баҳолаб, узоқ муддатли режалар, қонунчилик базаси ва хорижий тажрибани жалб этиш ишларини алоҳида эътироф этди.

Ташриф доирасида Ўзбекистон делегацияси Бутунжаҳон ядро университети раҳбари Сам Бильбао-и-Леон, Франциянинг “Orano” ва Канаданинг “AtkinsRéalis” компаниялари раҳбарияти билан учрашди.

Шунингдек, Руанда Атом энергияси кенгаши раиси ва президент маслаҳатчиси Лассина Зербо билан қатор муҳим икки томонлама учрашувлар ўтказилди.