ТОШКЕНТ, 22 май. /“Дунё” АА/. Ўзбекистон Соғлиқни сақлаш вазирлиги ва Франциянинг машҳур “Gustave Roussy” онкология институти ўртасидаги ҳамкорлик доирасида пойтахтимизда “Gustave Roussy International – Uzbekistan” лойиҳасининг расмий очилиш маросими бўлиб ўтди, деб хабар бермоқда “Дунё” АА мухбири.

Республика ихтисослаштирилган онкология ва радиология илмий-амалий тиббиёт марказида ташкил этилган тантанали тадбирда “Gustave Roussy” институти бош директори Фабрис Барлези, Ўзбекистон Президенти Администрацияси ва Соғлиқни сақлаш вазирлиги масъуллари, халқаро экспертлар ҳамда соҳанинг етакчи олимлари иштирок этди.

Мазкур лойиҳа Ўзбекистонда онкологик ёрдам кўрсатиш тизимини халқаро стандартлар асосида модернизация қилиш, замонавий клиник ёндашувларни жорий этиш ва соҳада бошқарув тизимини такомиллаштириш йўлидаги тарихий қадам ҳисобланади.

Ҳамкорлик доирасида тиббиёт амалиётига “Gustave Roussy” институтининг сифат стандартлари ҳамда Европа тиббий онкология жамияти (ESMO) протоколларини интеграция қилиш кўзда тутилган. Шунингдек, клиник ва ташкилий жараёнларни оптималлаштириш, саратон касалликларини ташхислаш ва даволашнинг энг илғор усулларини амалиётга киритиш, хусусан, кўкрак бези саратонини даволаш протоколларини синовдан ўтказиш (апробация) бўйича тизимли ишлар олиб борилмоқда.

Франция делегациясининг ташрифи доирасида лойиҳа Ижроия қўмитасининг биринчи йиғилиши ўтказилиши режалаштирилган. Унда қўмита таркиби, иш формати ва истиқболдаги устувор вазифалар тасдиқланади. Мазкур тузилма лойиҳа ижросини мониторинг қилиш, эришилган натижаларни баҳолаш ва ҳамкорликнинг кейинги босқичларини мувофиқлаштириш билан шуғулланади.

Франциялик мутахассислар Республика онкология маркази фаолияти, у ердаги “пациент йўли” (patient pathway) тизими билан яқиндан танишади. Шу билан бирга, колоректал саратон бўйича мультидисциплинар жамоавий (MDT) консилиумларда иштирок этади ҳамда марказнинг Самарқанд филиалига ташриф буюради.

“Gustave Roussy International – Uzbekistan” лойиҳасининг ишга туширилиши юртимизда юқори технологияли онкологик ёрдам сифатини ошириш ва Ўзбекистоннинг минтақавий тиббиёт хаби сифатидаги мақомини янада мустаҳкамлашга хизмат қилади.