ЛОНДОН, 5 сентябрь. /"Дунё" АА/. Ўзбекистон элчиси Равшан Усманов Англиянинг "Aston Villa" футбол клубининг бизнесни ривожлантириш масалалари бўйича президенти Крис Хек билан учрашув ўтказди, деб хабар қилмоқда "Дунё" АА мухбири.

Крис Хек Ўзбекистонда спортни хусусан, футболни ёшлар ўртасида оммалаштириш ва иқтидорли спортчиларнинг янги авлодини тарбиялаш борасида амалга оширилаётган кенг кўламли ишларни юқори баҳолади. Шунингдек, у Ўзбекистон спортчиларининг Париж-2024 ёзги Олимпия ўйинларида қўлга киритган ютуқларини эътироф этди.

"Aston Villa" футбол клуби Ўзбекистонда футболни янада ривожлантириш бўйича яқин ҳамкорликдан манфаатдор эканлиги таъкидланди.

Учрашув якунида "Aston Villa" футбол клуби билан биргаликда келгусида қўшма спорт тадбирларни ўтказиш бўйича келишувга эришилди.

1874 йилда Буюк Британиянинг Бирмингем шаҳрида ташкил этилган "Aston Villa" жаҳон футболининг тарихий ва нуфузли клубларидан бири сифатида эътироф этилади. "Aston Villa" Футбол лигаси асосчиларидан бири бўлган. Клуб 7 марта Англия чемпионлигини (ўша вақтдаги Биринчи дивизион), 7 марта Англия кубогини (FA Cup) ва 5 марта Англия Лига Кубогини қўлга киритган. Клуб ўз уй учрашувларини 42 мингдан ортиқ томошабинни ўз бағрига сиғдирадиган "Вилла Парк" стадионида ўтказади.