ВАШИНГТОН, 15 июнь. /“Дунё” АА/. Ўзбекистон элчихонасига Атланта шаҳри мери Андре Диккенс номидан табрик хати келиб тушди, деб хабар бермоқда “Дунё” АА мухбири.

Ушбу мактубда Атланта шаҳри мери Ўзбекистон элчихонаси дипломатларига ўзининг самимий тилакларини йўллаган.

“FIFA-2026 Жаҳон чемпионати доирасида Атланта шаҳрига ташриф буюрадиган ўзбекистонлик мухлислар, меҳмонлар ва расмий делегацияларни қутлашдан мамнунман. Ўзбекистон миллий терма жамоаси ўйинларидан бирини Атлантада ўтказиши ҳақидаги хабарни катта ҳаяжон ва мамнуният билан қарши олдик ҳамда миллий жамоангиз ва унинг кўплаб ишқибозларини шаҳримизда кутиб олишни интизорлик билан кутмоқдамиз”, дейилган хатда.

Шунингдек, Андре Диккенснинг таъкидлашича, Атланта учун ушбу тарихий жаҳон спорт анжуманига мезбонлик қилувчи шаҳарлардан бири бўлиш катта шарафдир. Дунёнинг турли бурчакларидан келган турфа маданият ва миллат вакиллари томонидан шаклланган шаҳар очиқлик, инклюзивлик ва хилма-хиллик тамойилларига доимо содиқдир.

Жаҳон чемпионати нафақат спорт ютуқларини, балки Атланта сингари шаҳарларда юксак қадрланадиган маданий бойлик, инсоний ришталар қудрати ва халқаро ҳамкорликни намоён этиш учун ҳам ноёб имконият яратади.

“Маъмуриятим барча меҳмонларнинг шаҳримизга ташрифи хавфсиз, мазмунли ва унутилмас бўлишини таъминлаш учун бор куч-ғайратини ишга солади. Биз меҳмонларга Атлантанинг анъанавий меҳмондўстлиги, бой маданий ҳаёти ва халқаро муҳитини намойиш этишдан мамнун бўламиз. Ушбу ўзгача даврда элчихонангиз ва ташриф буюрадиган делегациялар билан ҳамкорлик қилиш имкониятини мамнуният билан қабул қиламиз”, дея фикр билдирган шаҳар мери ўз мактубида.

Шу билан бирга, хатга шаҳарда бўлиб ўтадиган тадбирлар рўйхати илова қилинган.

“Турнир давомида Атлантада бўладиган делегация аъзолари, ҳамкасбларингиз ва мухлислар учун қизиқарли бўлиши мумкин бўлган турли маданий, ижтимоий ва мухлислик тадбирлари ҳақида маълумотлар келтирилган. Чемпионатга тайёргарликнинг кейинги босқичларида барча масалалар юзасидан мер бошқармасининг Халқаро ишлар ва иммигрантлар масалалари бўйича ижрочи директори Паулина Гузманга paguzman@atlantaga.gov электрон почта манзили орқали мурожаат қилишингизни сўрайман”, дея Атланта шаҳри мери ўз мактубини якунлаган.

Эслатиб ўтамиз, Ўзбекистон миллий терма жамоаси FIFA Жаҳон чемпионати ўтказиладиган даврда АҚШнинг Атланта агломерациясида жойлашишга қарор қилган эди. Жамоа Мариэтта шаҳридаги “Atlanta United” клубининг ўқув-машғулот мажмуасида жойлашган.