ТОШКЕНТ, 31 июль. /“Дунё” АА/. Агар FIFA президенти Жанни Инфантино жаҳон чемпионати ҳуқуқларининг бир қисмини хусусий инвесторларга сотиш режасидан воз кечмаса, Европа футбол ассоциациялари иттифоқи (UEFA) Халқаро футбол федерациясининг (FIFA) барча турнирларини бойкот қилишга қарор қилди, деб хабар бермоқда “Дунё” АА мухбири.

Германиянинг “Deutsche Welle” радиостанциясининг хабар беришича, UEFAнинг барча 55 аъзоси FIFAнинг турнир ҳуқуқларининг бир қисмини хусусий инвесторларга сотиш бўйича аввал эълон қилинган режаларига норозилик белгиси сифатида жаҳон чемпионатини бойкот қилишни қўллаб-қувватлаган.

30 июль куни Европанинг барча 55 та миллий футбол ассоциацияси иштирокида ўтказилган шошилинч йиғилишда, агар Инфантино ўз режасини ­– жаҳон чемпионати ҳуқуқларининг бир қисмини хусусий инвесторларга сотишни амалга оширадиган бўлса, ФИФАнинг барча турнирларини бойкот қилиш тўғрисида қарор қабул қилинди.

“Таклиф тўлиқ қайтариб олинса ҳамда ташкилот бундан буён хусусий мулкдорларнинг FIFA ёки унинг турнирларини бошқаришига ҳеч қачон йўл қўймаслиги ҳақида қонуний кафолатлар тақдим этсагина, Европа терма жамоалари мусобақаларда иштирок этади”, дея аниқлик киритган “Deutsche Welle” UEFAга таяниб.