ТОШКЕНТ, 21 август. /“Дунё” АА/. Ўзбекистоннинг Тошкент вилояти Бўстонлиқ туманида қуввати 20 МВт бўлган Чорвоқ шамол электр станцияси ишга туширилди, деб хабар бермоқда “Дунё” АА мухбири.

Хитойнинг “Синьхуа” ахборот агентлиги маълумотига кўра, станцияга ҳар бирининг қуввати 5 МВт бўлган тўртта шамол генератори ўрнатилган бўлиб, улар йилига 50 миллион кВт-соатгача электр энергияси ишлаб чиқариши мумкин.

Янги электр станциясининг ишга туширилиши минглаб маҳаллий оилаларнинг электр энергиясига бўлган эҳтиёжини қоплаш, қарийб 12 миллион куб метр табиий газни тежаш ва карбонат ангидрид чиқиндиларини йилига тахминан 24 минг тоннага камайтириш имконини беради. Умуман олганда, 20 мингга яқин хонадон экологик тоза электр энергияси билан таъминланади.

Чорвоқ ШЭС лойиҳаси Хитойнинг 28 миллион АҚШ доллари миқдоридаги грант кўринишидаги молиявий кўмаги билан амалга оширилди.