ТОКИО, 8 сентябрь. /"Дунё" АА/. Ўзбекистон элчиси Муҳсинхўжа Абдураҳмонов "Onodera User Run" компанияси  раҳбарияти билан музокара ўтказди, деб хабар қилмоқда "Дунё" АА мухбири.

Мулоқот чоғида меҳнат миграцияси соҳасида ҳамкорликда амалга оширилаётган лойиҳалар ва истиқболдаги режалар муҳокама қилинди.

"Onodera User Run" компанияси юртимизда ўзбекистонлик ёшларга япон тили ва тегишли касбларни ўргатишга қаратилган лойиҳани амалга оширмоқда. Хусусан, мазкур компания томонидан Тошкент шаҳрида ўқув маркази фаолиятини йўлга қўйилмоқда.

Мазкур ўқув марказида таълим олган талабгорлар ҳайдовчилик, қарияларни парваришлаш ва озиқ-овқат маҳсулотлари ишлаб чиқариш каби соҳаларда Японияда иш билан таъминланади.

Мулоқот якунида ўзаро ҳамкорликни ривожлантириш мақсадида  мулоқотни давом эттиришга келишиб олинди.