ВАРШАВА, 22 декабрь. /“Дунё” АА/. Польшадаги мамлакатимиз элчихонаси дипломатлари ушбу мамлакат Қишлоқ хўжалигини ривожлантириш миллий маркази (КОWR) бош директори ўринбосари Луциан Зволак билан учрашув ўтказди, деб хабар қилмоқда “Дунё” АА мухбири.

Мулоқот жараёнида икки давлат ўртасида қишлоқ хўжалиги соҳаси ҳамкорлик алоқаларини янада ривожлантириш масалалари муҳокама қилинди. Музокаралар якунида қуйидаги келишувларга эришилди:

-КОWR ўзига тегишли бўлган Мазовия ва Лодзь воеводаликлари чегарасида жойлашган 2 та бинодан бирини ўзаролик тамойили асосида Ўзбекистон логистика маркази (хаб) учун ажратиши;

-Ўзбекистондан ишчи гуруҳининг Польшага ташрифи чоғида лойиҳа таклифларини шакллантириш;

-Ўзбекистондан малакали ишчилар ёки аграр университетлар талабаларини КОWRга тегишли бўлган 40 та қишлоқ хўжалигига ихтисослашган компанияларда мавсумий ишларга жалб қилиш;

-Польша компанияларининг 2026 йил 1–3 апрель кунлари Тошкентда “UzFood – 2026” халқаро кўргазмасида иштирок этиш;

-Ўзбекистон корхоналарининг “AGROTECH” (Кельце, 2026 йил 13–15 март) ва “POLAGRA” (Познань, 2026 йил 23–25 сентябрь) халқаро кўргазмаларда қатнашиш.

Учрашув давомида Луциан Зволак давлатлар ўртасидаги экспорт-импорт алоқалари йилдан йилга кенгайиб бораётганини қайд этди. Жумладан, 2024 йилда Польшадан Ўзбекистонга 72 миллион евро қишлоқ хўжалиги маҳсулотлари экспорт қилинган бўлса, Ўзбекистондан Польшага ушбу маҳсулотлар импорти 10 миллион еврони ташкил этган. У мазкур кўрсаткичларни келгусида 3 баробар оширишга барча имкониятлар мавжудлигини таъкидлади.