БРЮССЕЛЬ, 15 январь. /“Дунё” АА/. Бельгиянинг “Travel Tomorrow” нашрида “Америкаликлар 2026 йилдан Ўзбекистонга визасиз саёҳат қилиши мумкин” сарлавҳали мақола эълон қилинди, деб хабар бермоқда “Дунё” АА мухбири.

Мақола муаллифи Камилла Ван Пеомбрукнинг таъкидлашича, Ўзбекистон 2026 йил 1 январдан бошлаб, АҚШ фуқаролари учун виза талабларини бекор қилди ва уларга 30 кунгача визасиз киришга рухсат берди. Бу қоида Президент Шавкат Мирзиёевнинг 2025 йил 3 ноябрдаги фармонида кўзда тутилган.

Ўзбекистон Президенти Шавкат Мирзиёев биринчи фармонни 2025 йил 15 майда имзолаган бўлса-да, янги қоидалар қачон кучга кириши аниқ белгиланмаган эди. 2025 йил 3 ноябрда қабул қилинган фармон билан янги режимнинг расмий бошланиш санаси - 2026 йил 1 январь этиб белгиланди.

Мақолада ёзилишича, янги сиёсат икки мамлакат ўртасидаги ўзаро ҳамкорликни мустаҳкамлаш, ишбилармонлик, академик ва маданий алмашинувларни кенгайтириш мақсадида амалга оширилмоқда. Визасиз режим АҚШ фуқароларига Ўзбекистон бўйлаб эркин саёҳат қилиш, унинг бой тарихий мероси билан танишиш, мамлакатнинг сармоявий ва сайёҳлик имкониятларини ўрганиш имконини беради.

Илгари туристик мақсадларда саёҳат қилаётган 16 ёшгача бўлган болалар қонуний васий ҳамроҳлигида Ўзбекистонга визасиз киришлари мумкин эди. Бунда бўлишнинг максимал муддати 90 кунни ташкил этарди. Бундан ташқари, 55 ёш ва ундан катта саёҳатчилар мамлакатга 30 кунгача визасиз туристик мақсадларда ташриф буюриш ҳуқуқига эга эди.

Энди бу тизим бекор қилинди. 2026 йил 1 январдан бошлаб АҚШнинг барча фуқаролари, ёшидан қатъий назар, Ўзбекистонда 30 кунгача визасиз бўлиш ҳуқуқига эга бўлади. Яъни эндиликда мамлакатга кириш учун на виза, на электрон виза ва на таклифнома керак бўлади.

Ушбу қадам Ўзбекистоннинг 2030 йилга бориб, 15 миллион хорижий сайёҳга эришиш бўйича стратегиясининг бир қисмидир. Хорижлик экспертларнинг таъкидлашича, 2024 йилда ўтказилган тадқиқотлар шуни кўрсатдики, виза чекловлари туризм ривожига салбий таъсир кўрсатмоқда. Шуни ҳисобга олган ҳолда, Ўзбекистон 2025 йил октябрь ойида Яқин Шарқнинг олтита давлати: Баҳрайн, Қатар, Қувайт, Уммон, Саудия Арабистони ва Иордания учун визасиз режимни жорий этди.

Виза сиёсатидаги ўзгаришлардан ташқари, Ўзбекистон маркетинг кампанияларини фаол ривожлантирмоқда. Буюк ипак йўлидаги тарихий шаҳарлар, жумладан, Бухоро, Хива ва Самарқандни тарғиб қилишга алоҳида эътибор қаратилмоқда.

Иккала стратегия ҳам ижобий натижалар бермоқда. Статистик маълумотларга кўра, 2024 йилда Ўзбекистонга 8,2 миллион хорижий сайёҳ ташриф буюрган, бу ўтган йилга нисбатан қарийб 25 фоизга кўпдир. 2025 йил охиридан бошлаб мамлакат расман дунёнинг энг тез ривожланаётган сайёҳлик йўналишлари қаторига кирди ва глобал сайёҳлик харитасида ўз мавқеини жадал мустаҳкамлаётганини тасдиқланди.

БМТнинг Бутунжаҳон туризм ташкилотимаълумотларига кўра, Ўзбекистон 2025 йилнинг январь-сентябрь ойларида халқаро сайёҳлар оқимининг ўсиш суръатлари бўйича дунёнинг етакчи еттита давлати қаторига кирган.