ЛОНДОН, 3 август. /"Дунё" АА/. Ўзбекистон элчиси Равшан Усманов Британиянинг "Razlin Capital" компанияси таъсисчиси Содиқ Разоқ билан учрашув ўтказди, деб хабар қилмоқда "Дунё" АА мухбири.

Содиқ Разоқ Ўзбекистон томонини "Razlin Capital" компанияси фаолияти билан батафсил таништирди. Шунингдек, компания Ўзбекистоннинг йирик бизнес субъектлари ва тадбиркорларининг Британия бозорларига кириши, республикага хорижий инвестицияларни жалб этиш, жумладан халқаро IPOлар ўтказиш йўналишларида ҳамкорликка тайёрлиги билдирилди.

Мулоқот якунида мазкур йўналишларда ўзаро ҳамкорлик алоқаларини янада жадаллаштириш мақсадида келгусида икки томонлама учрашув ва ташрифларни ишлаб чиқишга келишиб олинди.

"Razlin Capital" инвестицияларни жалб этишга кўмаклашувчи консалтинг компанияси ҳисобланади. Ташкилот ўз мижозлари учун молия бозорлари билан ҳамкорлик ўрнатишга, қолаверса хусусийлаштириш йўналишларига доир тавсияларни ишлаб чиқади.