PARIJ, 17-aprel. /“Dunyo” AA/. Fransiya va Buyuk Britaniya yetakchilari bugun Parijda Ho‘rmuz bo‘g‘ozi orqali kema qatnovini qayta tiklash rejasini ilgari surish uchun o‘nlab mamlakatlar vakillarini to‘playdi, deb xabar bermoqda “Dunyo” AA muxbiri “The Associated Press” agentligiga tayanib.

Qayd etilishicha, AQSh bu maslahatlashuvlarda ishtirok etmayapti. “Ho‘rmuz bo‘g‘ozida dengiz qatnovi erkinligini taʼminlash tashabbusi” (“Strait of Hormuz Maritime Freedom of Navigation Initiative”) deb nomlangan tashabbus Eron jahon neftining beshdan bir qismi o‘tadigan bo‘g‘ozni to‘sib qo‘yganidan keyin kema qatnovi xavfsizligini taʼminlashga qaratilgan.

Fransiya prezidenti Emmanuel Makronning aytishicha, missiya qatʼiy mudofaa xarakteriga ega bo‘lib, faqat jangovar harakatlarda ishtirok etmayotgan davlatlar uchun ochiq bo‘ladi.

Buyuk Britaniya Bosh vaziri Kir Starmer bo‘g‘ozning ochilishini global masʼuliyat deb atadi va energiya va savdoning erkin harakatini tiklash zarurligini aytdi.

Fransiya tomoni maʼlumotlariga ko‘ra, muzokaralarda 30 ga yaqin davlat, jumladan, Yaqin Sharq va Osiyo davlatlari ishtirok etadi. Kutilayotgan ishtirokchilar orasida Germaniya kansleri Fridrix Mers va Italiya bosh vaziri Jorja Meloni ham bor.

Missiyaning mumkin bo‘lgan harbiy va texnik taʼminoti: razvedka, minalardan tozalash, kemalarni kuzatib borish va qirg‘oqbo‘yi davlatlari bilan aloqa tizimlari muhokama qilinmoqda. Buyuk Britaniya minaga qarshi dronlardan foydalanishni ko‘rib chiqmoqda, Fransiya esa mintaqada aviatashuvchi, vertolet tashuvchi va fregatlarni joylashtirdi.

Qayd etilishicha, AQSh operatsiyani rejalashtirishda ishtirok etmagan. Prezident Donald Tramp avvalroq javob blokadasini eʼlon qilgan va ittifoqchilarni yetarli darajada ishtirok etmagani uchun tanqid qilgan edi.

Fransiya harbiylarining so‘zlariga ko‘ra, missiya loyihasi shakllanish bosqichida va mamlakatlarning yakuniy ishtiroki ehtimoliy o‘t ochishni to‘xtatishdan keyingi xavfsizlik holatiga bog‘liq bo‘ladi.

“Reuters” agentligi surati