LONDON, 5-may. /“Dunyo” AA/. Britaniyaning “London Post” nashrida Amir Temur tavalludining 690 yilligiga bag‘ishlangan tantanali tadbir haqida maqola eʼlon qildi, deb xabar bermoqda “Dunyo” AA muxbiri.

Maqola mualliflari Raza Sayed va Muhammad Alining yozishicha, O‘zbekistonning Londondagi elchixonasida bo‘lib o‘tgan tadbir diplomatik aloqalarni mustahkamlash va kengaytirishda muhim ahamiyatga ega bo‘lgan. Unda diplomatlar, akademik doiralar vakillari va madaniyat arboblari ishtirok etgan.

Tadbirda O‘zbekistonning boy tarixi, milliy urf-odat va anʼanalari, madaniyati va diplomatiyasi haqida maʼlumot berilgan. Diplomatlar Amir Temur merosi hamda uning davlatchilik, ilm-fan, meʼmorchilik va sivilizatsiya rivojiga qo‘shgan hissasiga alohida to‘xtalib o‘tgan.

Uchrashuv davomida mehmonlarga o‘zbek milliy taomlari, jumladan, palov, somsa, turli shirinliklar va anʼanaviy ko‘k choy taklif etilgan. Mualliflarning fikricha, kechaning gastronomik qismi o‘zbek mehmondo‘stligi va madaniy o‘ziga xosligining yorqin ifodasi bo‘lgan.