ABU-DABI, 13-may. /“Dunyo” AA/. O‘zbekiston elchisi Umid Shodiyev BAAning qayta tiklanuvchi energiya yo‘nalishida faoliyat yurituvchi yirik davlat kompaniyasi – “Masdar” bosh direktori Muhammad Jamil al-Ramahiy bilan uchrashdi, deb xabar qilmoqda “Dunyo” AA muxbiri.

Muzokaralar davomida O‘zbekiston va “Masdar” o‘rtasidagi o‘zaro manfaatli hamkorlik Prezident Shavkat Mirziyoyevning 2019-yil mart oyida kompaniyaga tashrifidan so‘ng faollashgani taʼkidlandi.

“Masdar” rahbarining aytishicha, u O‘zbekiston bilan sheriklik rivojini yuqori baholaydi va hamkorlikning bugungi holatidan mamnunligini bildirdi. Shuningdek, u kompaniyaning “Yangi O‘zbekiston”ni barpo etishda ishtirok etishdan manfaatdor ekanini qayd etdi.

Bundan tashqari, hozirgi kunda “Masdar” Osiyoning to‘qqizta mamlakatida umumiy o‘rnatilgan quvvati 3 GVt bo‘lgan loyihalarni amalga oshirayotgani maʼlum qilindi. Kompaniya 2030-yilgacha loyihalar portfelini 6 GVtgacha kengaytirishni rejalashtirmoqda.

Uchrashuv yakunida “Masdar” kompaniyasi vakillari shu yilning 12–14-may kunlari O‘zbekiston poytaxtida bo‘lib o‘tayotgan “Energy Week” haftaligida hamda iyun oyida o‘tkazilishi rejalashtirilgan Toshkent xalqaro investitsiya forumida ishtirok etishga tayyor ekanini bildirdi.