MOSKVA, 7-iyul. /“Dunyo” AA/. O‘zbekiston Prezidenti 2026-yil oxirigacha ishga tushirilishi rejalashtirilgan “Yashirin iqtisodiyot xaritasi” raqamli platformasini yo‘lga qo‘yishni maʼqulladi, deb xabar bermoqda “Dunyo” AA muxbiri Rossiyaning “Ritm Yevrazii” nashriga tayanib.

Nashrning yozishicha, loyiha yashirin iqtisodiyot ulushini qisqartirish chora-tadbirlariga bag‘ishlangan taqdimot doirasida namoyish etilgan. Tizimga 16 ta masʼul vazirlik va idoraning axborot tizimlari integratsiya qilingan bo‘lib, u barcha maʼlumotlarni real vaqt rejimida qayta ishlash imkoniyatini beradi.

Taqdimotda keltirilgan maʼlumotlarga ko‘ra, so‘nggi ikki yil davomida kuzatilmaydigan iqtisodiyot ulushi 35 foizdan 23 foizgacha qisqargan. Bu davrda davlat byudjetiga qo‘shimcha ravishda 38 trillion so‘m mablag‘ tushgan, rasmiy band aholi soni 8,5 million nafardan oshgan, o‘rtacha oylik ish haqi esa qariyb 6,5 million so‘mga yetgan. 2030-yilga qadar yashirin iqtisodiyot hajmini yana ikki barobar qisqartirish, bandlikni 14 million nafarga yetkazish hamda naqdsiz to‘lovlar ulushini 75 foizgacha oshirish rejalashtirilgan.

Platforma 22 ta tarmoq, 85 ta soha, 14 ta hudud va 208 ta tumanni qamrab oladi. Soliq rejimi, tovar aylanmasi hajmi va hududlarning o‘ziga xos xususiyatlari kabi 100 dan ortiq xavf mezonlari asosida tizim tarmoqlarni avtomatik ravishda “yashil”, “sariq” va “qizil” toifalarga ajratadi.

Tizim orqali litsenziyasiz faoliyat yuritish, haqiqiy aylanmani, ish o‘rinlari va mehnatga haq to‘lash jamg‘armasini yashirish, rentabellik hamda foydani kamaytirish kabi xavflar avtomatik ravishda aniqlanadi.

Platformaning tahliliy imkoniyatlari nazorat organlari faoliyatini aniq yo‘naltirish, inson omilining taʼsirini kamaytirish hamda hal etilmagan masalalarni tuman darajasidan viloyat, keyin esa respublika darajasigacha yetkazish imkonini beradi.