TOKIO, 2-dekabr. /“Dunyo” AA/. Yurtimizning Yaponiyadagi elchisi Muxsinxo‘ja Abdurahmonov Yaponiya davlat tashqi ishlar vaziri Ayano Kunimitsu bilan uchrashdi, deb xabar qilmoqda “Dunyo” AA muxbiri.

Uchrashuvda davlat vaziri O‘zbekiston Yaponiya uchun muhim strategik hamkor davlat ekanini taʼkidlab, ikki mamlakat o‘rtasidagi o‘zaro ishonch va hurmatga asoslangan uzoq yillik hamkorlik aloqalarini yuksak qadrlashini maʼlum qildi.

Suhbatda so‘nggi yillarda Yaponiya va O‘zbekiston o‘rtasidagi siyosiy, parlamentlararo, savdo-iqtisodiy, madaniy-gumanitar, turizm sohalaridagi hamkorlik aloqalari tobora kengayib borayotgani eʼtirof etildi.

Jumladan, joriy yilning avgust oyida Yaponiya tashqi ishlar vazirining O‘zbekistonga tashrifi hamda ilk marotaba o‘tkazilgan ikki mamlakat TIV rahbarlarining strategik muloqoti natijalari o‘zaro hamkorlik aloqalarini faollashtirishga katta hissa qo‘shgani taʼkidlandi.

Uchrashuv yakunida tashqi ishlar vaziri bilan ikki tomonlama hamkorlikni yana-da kengaytirish va rivojlantirish bo‘yicha muloqotlarni muntazam ravishda davom ettirishga kelishib olindi.