ISTANBUL, 26-yanvar. /“Dunyo” AA/. Istanbul shahrida turkiyalik ishbilarmonlar ishtirokida o‘tkazilgan biznes-forumda Andijon viloyati hokimi ham qatnashdi, deb xabar qilmoqda “Dunyo” AA muxbiri.

120 nafardan ziyod turkiyalik ishbilarmonlar ishtirok etgan biznes-forumda Andijon viloyati hokimi Shuhratbek Abduraxmonov so‘zga chiqib, yurtimizda, xususan, Andijon viloyatida tadbirkorlar va investorlar uchun yaratilgan shart-sharoit va imkoniyatlar xususida to‘xtalib o‘tdi.

Mazkur forum O‘zbekiston va Turkiya o‘rtasidagi savdo-iqtisodiy hamkorlikni yanada mustahkamlash, hududlar o‘rtasida to‘g‘ridan-to‘g‘ri aloqalarni kengaytirish hamda o‘zaro manfaatli investitsiya loyihalarini amalga oshirish maqsadida tashkil etildi.

Forum doirasida Andijon viloyatining sanoat, qishloq xo‘jaligi, to‘qimachilik, mebelsozlik hamda logistika sohalaridagi investitsiyaviy salohiyati namoyish etildi.