KIYEV, 16-yanvar. /“Dunyo” AA/. Ukrainaning “Fixygen” va “Open4business” nashrlarida amerikalik yirik investor Jim Rojersning O‘zbekiston kompaniyalari aksiyalariga sarmoya kiritgani xususida maqola eʼlon qilindi, deb xabar qilmoqda “Dunyo” AA muxbiri.

Maqolada yozilishicha, taniqli amerikalik investor va “Quantum Fund” hammuassisi, taxminan 300 million dollar boylikka ega “Rogers Holdings” egasi Jim Rojers Rossiya va Amerika aktivlaridan to‘liq chiqib, mablag‘larni O‘zbekiston kompaniyalari aksiyalariga yo‘naltirgan.

2025-yil oxiri holatiga ko‘ra, Rojersning investitsiya portfeli Toshkent respublika fond birjasida kotirovka qilinadigan aksariyat emitentlarning qimmatli qog‘ozlari bilan to‘ldirildi.

Investitsiya muhitidagi manbalarga ko‘ra, Rojers Markaziy Osiyoning rivojlanayotgan bozorlariga eʼtibor qaratgan holda diversifikatsiya strategiyasini amalga oshirdi. U O‘zbekiston iqtisodiyotining asosiy tarmoqlarini - energetika va foydali qazilmalarni qazib olishdan tortib qishloq xo‘jaligi va moliyaviy xizmatlargacha qamrab olgan 85 ga yaqin kompaniyaning aksiyalarini sotib oldi. Investor respublikaning suveren qarzini sotib olishdan bosh tortdi va valyuta xatarlarini zanjirlashni qo‘llamadi, bu esa O‘zbekiston iqtisodiyotining uzoq muddatli salohiyatiga ishonchni namoyish etdi.

Ushbu qadam Rojersning mintaqaga bo‘lgan ko‘p yillik qiziqishining cho‘qqisi bo‘ldi. 2021-yildan boshlab u O‘zbekistondagi islohotlarni, jumladan, bozorni liberallashtirish va aksiyalarni birlamchi ommaviy joylashtirishga (IPO) tayyorgarlikni faol kuzatib borgan.

“O‘zbekiston ulkan o‘sish salohiyatiga ega mamlakat bo‘lib, islohotlar investorlar uchun qulay sharoitlar yaratmoqda”, dedi Jim Rojers yaqinda bergan intervyusida.