LYUKSEMBURG, 8-dekabr. /“Dunyo” AA/. Mamlakatimizning Belgiyadagi elchixonasi va Lyuksemburg Savdo palatasi bilan hamkorlikda O‘zbekistonning iqtisodiy va investitsiyaviy salohiyatiga bag‘ishlangan taqdimot o‘tkazildi, deb xabar bermoqda “Dunyo” AA muxbiri.

Tadbirda Lyuksemburgning biznes doiralaridan 50 nafarga yaqin vakil ishtirok etdi.

Diplomatlar anjuman ishtirokchilariga yurtimizda yaratilgan investitsiyaviy muhit va uni liberallashtirish borasida amalga oshirilayotgan chora-tadbirlar haqida maʼlumot berdi. Moliyaviy xizmatlar, raqamli hukumat, logistika sohalari, infratuzilma va davlat-xususiy sheriklik asosida amalga oshirilayotgan ishlar xususida so‘z yuritildi.

Uchrashuvda Lyuksemburgdagi maishiy kimyo sanoatida faoliyat yuritayotgan “JNSLAB”, to‘qimachilik bo‘yicha “G-Core Labs” hamda “Sonneg” kompaniyalari rahbarlari O‘zbekistonda keng ko‘lamli iqtisodiy islohotlar va liberallashuv jarayonlari boshlanganidan so‘ng mamlakatdagi muvaffaqiyatli faoliyati haqida gapirib berdi.

Tadbir yakunida Lyuksemburg delegatsiyasining 2026-yilda O‘zbekistonga savdo missiyasini amalga oshirish bo‘yicha tegishli chora-tadbirlar ishlab chiqilayotgani taʼkidlandi.