QOHIRA, 17-avgust. /“Dunyo” AA/. Misrda AQSH prezidentining maxsus vakili Jared Kushner HAMAS rahbariyati vakillari bilan uchrashib, agar harakat Isroildan tegishli choralarni kutayotgan bo‘lsa, qurolsizlanish bo‘yicha amaliy qadamlar tashlashini talab qildi, deb xabar bermoqda “Dunyo” AA muxbiri.

Uchrashuv G‘azo sektori uchun tinchlik rejasini amalga oshirish doirasida bo‘lib o‘tdi va taxminan 90 daqiqa davom etdi. “Axios” portalining maʼlum qilishicha, suhbat HAMASning o‘z zimmasiga olgan majburiyatlarni bajarishi yo‘lidagi muhim qadamlarni taʼminlash nuqtai nazaridan “juda samarali” kechgan.

Falastin harakati vakillari maxsus elchidan Donald Trampga kelishuvlarga sodiq qolishini yetkazishni so‘radi. Bunga javoban Amerika tomoni “faqat so‘zlarni emas, balki aniq harakatlarni kutayotganini” maʼlum qildi.

Jared Kushnerning taʼkidlashicha, agar HAMAS Isroilning ham tegishli majburiyatlarni bajarishini istasa, u qurolsizlanish bo‘yicha amaliy qadamlar tashlashi shart. Xususan, G‘azoni boshqarish vakolatlarini Falastin texnokratlar hukumatiga topshirish va HAMASning kelajakda sektorni boshqarishda ishtirok etmasligini kafolatlash haqida so‘z bormoqda.

Uchrashuvda “Tinchlik kengashi”ning yuqori martabali vakili Nikolay Mladenov, Buyuk Britaniyaning sobiq bosh vaziri Toni Bler, kengashning katta maslahatchilari Are Laytstoun va Liran Tankman qatnashdi. HAMAS tomonidan harakat yetakchisi Xalil al-Xayya ishtirok etdi. Muzokaralarda Misr Umumiy razvedka xizmati rahbari Hasan Rashad, qatarlik va turkiyalik diplomatlar ham qatnashdi.

Uchrashuvdan so‘ng HAMAS Donald Tramp rejasining ikkinchi bosqichi bo‘lgan “yo‘l xaritasi”ga, yaʼni doimiy o‘t ochishni to‘xtatish, Isroil kuchlarini G‘azodan to‘liq olib chiqish, gumanitar yordamni davom ettirish va sektorni tiklashni boshlashga roziligini eʼlon qildi. Shu bilan birga, bayonotda qurolsizlanish haqida alohida so‘z yuritilmagan.

Bugun Jared Kushnerning Isroilga tashrif buyurishi va Isroil tomonining tegishli qadamlarini muhokama qilish uchun Bosh vazir Binyamin Netanyaxu bilan uchrashishi kutilmoqda. Avvalroq Isroil bosh vaziri HAMAS to‘liq qurolsizlanmaguncha Isroil o‘z qo‘shinlarini olib chiqmasligini aytgan edi.

“Axios” maʼlumotlariga ko‘ra, agar harakat qurolsizlanishni boshlasa, Isroilning javob choralari Xalqaro barqarorlashtirish kuchlarini G‘azoga kiritish, Rafah hududida tiklash ishlarini boshlash, Isroil qo‘shinlarining dastlabki olib chiqilishini muhokama qilish hamda sektorga gumanitar yordamni tezlashtirishni o‘z ichiga olishi mumkin.

Eslatib o‘tamiz, G‘azoda mustahkam tinchlikka erishish maqsadida Prezident Donald Tramp tashabbusi bilan “Tinchlik kengashi” tuzilgan. Kengash nizomi 2026-yil 22-yanvarda Davosdagi Jahon iqtisodiy forumi doirasida imzolangan. Birinchi yig‘ilish 19-fevral kuni Vashingtonda bo‘lib o‘tdi. Unda O‘zbekiston Prezidenti Shavkat Mirziyoyev ishtirok etib, nutq so‘zlagan.

“AFP” agentligi surati