LONDON, 9-sentabr. /“Dunyo” AA/. Qishloq xo‘jaligi mahsulotlari eksportini kengaytirish doirasida O‘zbekiston uzumi va qovunlarining yangi turlari Buyuk Britaniyaga yetkazib berildi, deb xabar bermoqda “Dunyo” AA muxbiri.

Mamlakatimizning Londondagi Elchixonasi ko‘magida Britaniyaning “Capital Foodservice” kompaniyasi tomonidan “Kelin barmoq” navli uzum hamda “Torpeda”, “Ko‘kcha” va “Obi novvot” qovunlari import qilinmoqda.

Qishloq xo‘jaligi mahsulotlari “Uzbekistan Airways” aviakompaniyasining muntazam qatnovlari orqali manzilga yetkazilmoqda. Ushbu jarayon mavsum yakuniga qadar izchil davom ettirilishi ko‘zda tutilgan.

Mazkur hamkorlik Britaniya bozorida milliy meva-sabzavotlarimizga bo‘lgan talabni oshirish va o‘zbek mahsulotlarining nufuzini yanada mustahkamlashga xizmat qiladi.