Sindarov–Dommaraju: bugun jahon shaxmat toji uchun tarixiy bellashuvning rasmiy ochilish marosimi bo‘lib o‘tadi
Noyabr 22, 2026. 14:00 • 3 daq
• 5TOSHKЕNT, 22-noyabr. /“Dunyo” AA/. Bugun Jeneva shahrida 2026 yilgi mutlaq jahon shaxmat chempionligi uchun amaldagi jahon chempioni, hindistonlik Gukesh Dommaraju hamda o‘zbekistonlik grossmeyster Javohir Sindarov o‘rtasidagi bahsning ochilish marosimi bo‘lib o‘tadi, deb xabar bermoqda “Dunyo” AA muxbiri.
Mazkur musobaqa O‘zbekiston shaxmati tarixidagi muhim voqea bo‘lib, Javohir Sindarov mamlakatimizdan jahon chempioni unvoni uchun kurashadigan birinchi shaxmatchi hisoblanadi.
FIDE dasturiga ko‘ra, chempionlik bellashuvlari 22-noyabrdan 13-dekabrga qadar Shveysariyaning Jeneva shahridagi Martin Bodmer jamg‘armasi muzeyida o‘tkaziladi. Bugun rasmiy ochilish marosimi bo‘lib o‘tsa, birinchi partiya 24-noyabr kuni Toshkent vaqti bilan soat 19:00 ga belgilangan. Oxirgi klassik partiya 11-dekabr kuni o‘tkaziladi, zarur bo‘lsa, 12-dekabr kuni tay-breyk bahslari bo‘lib o‘tadi.
Javohir Sindarov 2005-yilda Toshkentda tug‘ilgan. U shaxmat o‘rganishni to‘rt yoshida boshlagan va 2018-yilda grossmeyster unvonini qo‘lga kiritgan. Uning chempionlik bahsiga yo‘llanma olishiga 2025-yilda Hindistonda o‘tkazilgan Jahon kubogidagi g‘alabasi hamda 2026-yilda Kiprda tashkil etilgan FIDE Da’vogarlar turniridagi birinchi o‘rni asos bo‘ldi. Sindarov ushbu musobaqada 14 partiyadan 10 ochko to‘plab, biror marta mag‘lubiyatga uchramadi va g‘oliblikni bir tur qolganidayoq ta’minladi.
Uning raqibi Gukesh Dommaraju esa 2024-yil dekabr oyida Singapurda xitoylik Din Lijenni 7,5:6,5 hisobida mag‘lub etib, shaxmat tarixidagi 18-jahon chempioniga aylangan. O‘sha paytda u 18 yoshda edi. Mazkur uchrashuvda Gukesh o‘z chempionlik unvonini ilk bor himoya qiladi.
Qizig‘i shundaki, har ikki shaxmatchi ham o‘yinlar boshlanganda 20 yoshda bo‘ladi. Shu bois FIDE ushbu bahsni shaxmat tarixidagi eng yosh jahon chempionligi matchi sifatida qayd etmoqda.
Chempionlik musobaqasi ko‘pi bilan 14 ta klassik partiyadan iborat bo‘ladi. Har bir g‘alaba uchun bir ochko, durang uchun yarim ochko beriladi. 7,5 ochko to‘plagan shaxmatchi jahon chempioni bo‘ladi. Agar 14 partiyadan keyin hisob 7:7 bo‘lsa, g‘olib tay-breyk orqali aniqlanadi. Unda dastlab 15 daqiqalik nazorat va har bir yurish uchun 10 soniya qo‘shimcha vaqt bilan to‘rtta partiya o‘ynaladi. Zarur bo‘lsa, qisqaroq vaqt nazoratidagi rapid va blis partiyalariga o‘tiladi.
Matchning umumiy mukofot jamg‘armasi 2,5 million AQSh dollarini tashkil etadi. G‘olib 1,3 million, ikkinchi o‘rin sohibi esa 1,2 million dollar oladi. Har bir g‘alaba uchun shaxmatchiga qo‘shimcha 200 ming dollar ajratiladi.
Jenevadagi uchrashuv nafaqat ikki yosh grossmeysterning jahon chempionligi uchun kurashi, balki O‘zbekiston shaxmati uchun ham tarixiy sinov bo‘ladi. Javohir Sindarov mamlakatimizga ilk bor mutlaq jahon chempioni unvonini olib kelish imkoniyati uchun bahsga kirishadi.
Telegram kanalimizga obuna bo‘ling
Barcha yangiliklar va yangilanishlardan birinchi bo‘lib xabardor bo‘ling!
So‘nggi yangiliklar
Barchasi

