BISHKEK, 22-yanvar. /“Dunyo” AA/. Qirg‘izistonning “Vecherniy Bishkek” gazetasida “Taraqqiyot strategiyasi” markazi ijrochi direktori Eldor Tulyakovning maqolasi chop etildi, deb xabar bermoqda “Dunyo” AA muxbiri.

Unda qayd etilishicha, “O‘zbekiston – 2030” strategiyasi jahon iqtisodiyoti, texnologiyalari va xalqaro jarayonlardagi shiddatli o‘zgarishlarga moslashmoqda. Muallifning fikricha, asosiy dasturiy hujjatni takomillashtirish zarurati jamiyatning yangi shartlari va talablari, Yangi O‘zbekistonni yanada shakllantirish vazifalari bilan bog‘liq.

Ekspert taʼkidlaganidek, yangilangan strategiya zamirida davlatimiz rahbari tomonidan ilgari surilgan “davlat organlari xalqqa xizmat qilishi kerak” degan tamoyil mujassam. Yangi ko‘rinishda bu tezis aniq mexanizmlar bilan to‘ldiriladi – samaradorlik ko‘rsatkichlari qayta ko‘rib chiqiladi.

Har bir vazifaga masʼul idoralar biriktiriladi va moliyalashtirish manbalari yana-da shaffof bo‘ladi. Strategiya ijrosini monitoring qilish tizimini natijaga yo‘naltirish, hisobdorlik va raqamlashtirishga alohida eʼtibor qaratilmoqda.

Yangilangan strategiya har bir fuqaro uchun tushunarli va hissiy bo‘lishi kerakligi taʼkidlangan. Hujjat keng jamoatchilik maslahatlashuvlari asosida shakllantiriladi va aholining haqiqiy ehtiyojlari va ekspertlar hamjamiyatining takliflarini hisobga olgan holda jamoatchilik muhokamasiga qo‘yiladi.

Eldor Tulyakovning so‘zlariga ko‘ra, jamoatchilik fikrini aks ettiruvchi va aholi farovonligini oshirishga qaratilgan strategiyagina chinakam samarali va hayotiy bo‘lishi mumkin.