ANQARA, 6-may. /“Dunyo” AA/. O‘zbekistonning jozibador sarmoyaviy muhiti Turkiya ommaviy axborot vositalari diqqat markazida bo‘ldi, deb xabar bermoqda “Dunyo” AA muxbiri.

Xususan, “QHA” axborot agentligida O‘zbekiston iqtisodiyotiga kiritilayotgan kapital qo‘yilmalarning jadal o‘sishiga bag‘ishlangan maqola eʼlon qilindi.

Taqdim etilgan maʼlumotlarga ko‘ra, 2026-yilning birinchi choragida O‘zbekistonning asosiy kapitaliga kiritilgan investitsiyalar qariyb 30 foizga oshgan, bu esa iqtisodiy rivojlanishning misli ko‘rilmagan surʼati va xalqaro hamkorlar ishonchi ortib borayotganidan dalolat beradi.

Nashrda qayd etilishicha, joriy yilning dastlabki uch oyida investitsiyalar hajmi 156,3 trillion so‘mga yetgan. Bunday keng ko‘lamli o‘sishning asosiy drayveri 107,5 trillion so‘mni tashkil etgan xorijiy investitsiyalar va tashqi qarzlar bo‘ldi.

Turkiyalik tahlilchilarning fikricha, tashqi investitsiyalar bilan bir qatorda ichki bozorda ham faollik kuzatilmoqda. Mahalliy biznes ishlab chiqarishni modernizatsiya qilish uchun 20,5 trillion so‘m o‘z mablag‘larini yo‘naltirdi.

Yirik korporativ va davlat investitsiyalaridan tashqari, mamlakatda aholi va bank sektorining sezilarli hissasi qayd etilmoqda. Fuqarolarning shaxsiy investitsiyalari 8,6 trillion so‘mga, tijorat banklari kreditlari va boshqa qarz vositalari 4,2 trillion so‘mga yetdi. Loyihalarga davlat tomonidan qo‘shimcha yordam ko‘rsatilib, byudjetdan 3,9 trillion so‘m, Tiklanish va taraqqiyot jamg‘armasi tomonidan 566,3 milliard so‘m miqdorida mablag‘ ajratildi.

Turkiya ommaviy axborot vositalarining yozishicha, 2026-yil boshidagi tarixiy kapital oqimi mamlakatda amalga oshirilayotgan iqtisodiy islohotlarning muvaffaqiyati va barcha bozor subyektlarining yuqori faolligidan dalolat beradi.