BRYUSSEL , 24-fevral. /“Dunyo” AA/. Belgiyaning ommabop “Travel Tomorrow” nashrida “O‘zbekiston 2026-yil uchun 12 millionlik maqsadli turizm ambitsiyalarini ilgari surmoqda” sarlavhali maqola eʼlon qilindi, deb xabar qilmoqda “Dunyo” AA muxbiri.

Nashr bosh muharriri Antonio Buskardini muallifligidagi maqolada yozilishicha, O‘zbekiston o‘zining jadal o‘sib borayotgan turizm sohasini rivojlantirishda yangi muhim bosqichni eʼlon qildi: mamlakat 2026 yilda 12 million xorijiy mehmonni qabul qilishni rejalashtirmoqda. Bu maqsad 2026 yilda Toshkentda bo‘lib o‘tgan mehmonxona biznesi forumida alohida taʼkidlangan.

Ushbu tashabbus pandemiyadan keyin turizmning muvaffaqiyatli tiklanishini aks ettiradi va turizmni mamlakat iqtisodiy rivojlanishining asosiy drayverlaridan biriga aylantirishga qaratilgan keng ko‘lamli strategiyaga mos keladi.

“O‘zbekiston sayyohlarni joylashtirish imkoniyatlarini faol ravishda kengaytirmoqda. Turizm qo‘mitasi maʼlumotlariga ko‘ra, so‘nggi yillarda mamlakatda mingdan ortiq yangi joylashtirish vositalari – mehmonxonalar, xostellar va oilaviy mehmon uylari ochilgan”, deya fikr yuritgan muallif.

Materialda taʼkidlanishicha, O‘zbekistonda hozirda umumiy o‘rinlar soni qariyb 185,6 ming bo‘lgan 6 921 ta joylashtirish vositalari faoliyat ko‘rsatmoqda. Bu nafaqat o‘sib borayotgan sayyohlar sonini qabul qilish, balki xizmat ko‘rsatish sifatini oshirish, mamlakatning turli hududlaridan foydalanish imkoniyatini yaxshilash imkonini beradi.

Shu bilan birga, mamlakat sayyohlik xaritasini Ipak yo‘lining anʼanaviy shaharlari – Samarqand, Buxoro va Xivadan tashqariga kengaytirmoqda. Qashqadaryo, Qoraqalpog‘iston va Farg‘ona vodiysi kabi yangi yo‘nalishlarni rivojlantirishga eʼtibor qaratilib, sayyohlarga boy madaniy va tabiiy taassurotlar tanlovi taklif etilmoqda.

Raqamlashtirish turizmni uzoq muddatli rivojlantirishning strategik ustuvor yo‘nalishiga aylanmoqda. Hukumat sayyohlik tajribasini shaxsiylashtirish, tashrif buyuruvchilar oqimini optimallashtirish va butun sohada xizmat ko‘rsatish samaradorligini oshirish uchun sunʼiy intellekt va “aqlli” texnologiyalarni faol joriy etmoqda.

Ushbu innovatsiyalar 2030-yilgacha har yili 20 million xorijiy sayyohni jalb qilishdek ulkan maqsadga erishish uchun muhim vosita bo‘lib, bu milliy rivojlanish yo‘l xaritasida belgilangan.

Ichki turizm ham soha rivojiga katta hissa qo‘shmoqda. 2025-yilda O‘zbekiston fuqarolari “Travel Uzbekistan” dasturi doirasida 23,7 milliondan ortiq sayohatni amalga oshirdi. Bu xizmat ko‘rsatish standartlarini oshirish va turizm sohasining barqarorligini mustahkamlash imkonini berdi.

“Travel Tomorrow” maʼlumotlariga ko‘ra, O‘zbekiston allaqachon dunyodagi eng tez rivojlanayotgan sayyohlik yo‘nalishlari qatoriga kiradi. 2025-yilda xalqaro tashriflar soni qariyb 11 millionga yetdi, turizmdan olingan daromad esa 4,4 milliard AQSh dollaridan oshdi.

Barqaror investitsiyalar, yo‘nalishlarni diversifikatsiya qilish va raqamli texnologiyalarni faol joriy etish orqali O‘zbekiston jahon bozorida zamonaviy, raqobatbardosh va jozibador sayyohlik yo‘nalishi sifatidagi mavqeini ishonchli mustahkamlamoqda.