ASHXOBOD, 26-oktabr. /“Dunyo” AA/. BMTning Ashxoboddagi vakolatxonasida tashkilot tuzilganining 81 yilligiga bag‘ishlangan bayram tadbiri doirasida O‘zbekiston elchixonasi o‘zining milliy ko‘rgazmasini namoyish qildi, deb xabar bermoqda “Dunyo” AA muxbiri.

Tadbirda Turkmaniston davlat idoralari rahbarlari, Ashxobodda akkreditatsiyadan o‘tgan diplomatik missiyalar va xalqaro tashkilotlar vakolatxonalari rahbarlari, ishbilarmon va ilmiy doiralar, jamoatchilik hamda ommaviy axborot vositalari vakillari ishtirok etdi.

Uchrashuvda Turkmaniston tomonidan mamlakat tashqi ishlar vaziri o‘rinbosari Myaxri Byashimova qatnashdi.

Marosimda diplomatik vakolatxonalar hamda BMTning ixtisoslashgan muassasalari tomonidan milliy an’analarga bag‘ishlangan interaktiv maydonchalar, madaniy ko‘rgazmalar va pavilonlar tashkil etildi. Mehmonlar tashkilot loyihalari bilan tanishish hamda Barqaror rivojlanish maqsadlariga erishish masalalarini muhokama qilish imkoniga ega bo‘ldilar.

Milliy ko‘rgazma tashrif buyuruvchilarda katta qiziqish uyg‘otdi. Unda o‘zbek xalqining boy madaniy merosi, milliy liboslar, qadimiy an’analar va xalq amaliy san’ati namunalari namoyish etildi.

BMTning Turkmanistondagi doimiy koordinatori Greys Van tashkilot tashkil topgan kun insoniyat birligi, xalqaro hamkorlik va do‘stona aloqalarni mustahkamlash ramzi ekanini ta’kidladi.

Tadbir bayramona ruhda o‘tdi hamda ishtirokchilar va faxriy mehmonlarda yorqin taassurot qoldirdi.