LONDON, 19-oktabr. /“Dunyo” AA/. O‘zbekiston elchixonasi ko‘magida “O‘zbek texnologik metallar kombinati” (O‘zTMK) va London metallar birjasi (LME) o‘rtasida onlayn-muzokara o‘tkazildi, deb xabar bermoqda “Dunyo” AA muxbiri.

Uchrashuvda O‘zTMK vakillari kombinat faoliyati, amalga oshirilayotgan loyihalar va istiqbolli rejalar haqida taqdimot qildi. 

Shuningdek, ular O‘zbekistonning muhim minerallar sohasidagi xomashyo salohiyati, ishlab chiqarish imkoniyatlari va sohani rivojlantirishning ustuvor yo‘nalishlari xususida batafsil so‘zlab berdilar.

Tomonlar kritik va nodir metallar bozorlaridagi bugungi holat, bozor kon’yunkturasi hamda mahsulot narxini shakllantirish mexanizmlari yuzasidan fikr almashdi.

London metallar birjasi vakillari metall mahsulotlariga narx belgilash tamoyillari, bozor ma’lumotlaridan foydalanish va narxlarni tahlil qilish vositalari haqida batafsil ma’lumot berdi. Bunda “LME Insight” axborot-tahliliy platformasiga alohida e’tibor qaratildi.

Muzokara yakunida tomonlar kelgusi hamkorlikning istiqbolli yo‘nalishlarini belgilab oldilar. 

Mazkur muloqot O‘zbekistonning muhim minerallar va texnologik metallar sohasidagi salohiyatini xalqaro bozorlarga chiqarish, shuningdek, sohaning ilg‘or xalqaro tajribasi va bozor mexanizmlarini chuqurroq o‘rganish yo‘lidagi muhim qadam bo‘ldi.