JAZOIR, 16-iyul. /“Dunyo” AA/. Jazoir poytaxti yaqinidagi bolalar uyida sodir bo‘lgan yong‘in oqibatida 11 kishi halok bo‘ldi, 19 nafar odam jarohatlandi, deb xabar bermoqda “Dunyo” AA muxbiri “Al Arabiya” axborot portaliga tayanib.

Yong‘in bugun tongda Jazoirning Muhammadiya tumanida yuz berdi. Voqea joyiga mahalliy aholi va favqulodda xizmatlar xodimlari yetib kelgan. Yong‘indan so‘ng bino deraza teshiklari atrofidagi devorlarda kuyindi izlari qolgan.

Jazoir fuqaro muhofazasi xizmati maʼlumotlariga ko‘ra, jarohatlanganlarning o‘n nafari turli darajada kuygan. Shuningdek, qutqaruvchilar binodan nogironligi bo‘lgan besh kishini evakuatsiya qilgan.

Davlat rahbari Abdulmajid Tebbun yuz bergan yong‘in oqibatida bolalar halok bo‘lgani va boshqa tarbiyalanuvchilar jarohat olgani haqidagi xabarni eshitganini taʼkidlab, marhumlarning oila aʼzolariga hamdardlik bildirdi.

Yong‘inning kelib chiqish sababi va halok bo‘lganlar shaxsi va yoshi hozircha aniqlanmagan. Biroq yong‘in Jazoirda davom etayotgan jazirama issiq fonida sodir bo‘lgan. Maʼlum qilinishicha, 8-iyuldan buyon mamlakat bo‘ylab 913 ta yong‘in bartaraf etilgan.