SAMARQAND, 5-may. /“Dunyo” AA/. AQSHning Patrik MakGovern jamg‘armasi prezidenti Vilas S.Dxar “Dunyo” AA muxbiriga bergan intervyusida Samarqandda bo‘lib o‘tayotgan OTB Boshqaruvchilar kengashining 59-yillik yig‘ilishining ahamiyati haqida gapirdi:

– OTB Boshqaruvchilar kengashining 59-yillik yig‘ilishini Samarqandda o‘tkazish alohida ahamiyatga ega. Hozir biz dunyodagi chuqur o‘zgarishlar davrida yashayapmiz, hamma narsa yangidek tuyuladi. Bunday paytda qadimiy tarixga ega joyda bo‘lish juda muhim. Chunki bu maskanda sivilizatsiya mujassam.

Bugun biz duch kelayotgan ko‘plab muammolar o‘tmishda allaqachon sodir bo‘lgan. Samarqand – bu o‘zgarib borayotgan dunyo haqida fikr yuritadigan, o‘tmishdan saboq oladigan va kelajakka qarashni shakllantiradigan uchrashuvlar o‘tkazish uchun haqiqatan ham noyob joydir.

Osiyo taraqqiyot bankining kelajagi haqida gapirganda, men ushbu tashkilotning bir qismi bo‘lmagan holda, tashqi kuzatuvchi sifatida ishtirok etayotganimni taʼkidlamoqchiman. Shunga qaramay, dunyoga ko‘p tomonlama hamkorlik tamoyillarini yangi voqelikka moslashtira oladigan rivojlanish institutlari zarur.

Sunʼiy intellekt sohasida ishlayotganimda shuni ko‘ramanki, sunʼiy intellektni rivojlantirish bir yoki ikki davlatning qo‘lida jamlanishi mumkin emas, bu umumiy boylik bo‘lishi kerak. OTB kabi tashkilotlar Markaziy Osiyo mamlakatlarida sunʼiy intellektni qo‘llashga eʼtibor qaratishi kerak. Biz uchun O‘zbekiston va qo‘shni davlatlar tajribasini o‘rganish va bu bilimlarni global miqyosda baham ko‘rish muhimdir.

Bu mening Markaziy Osiyo va O‘zbekistonga birinchi tashrifim. Bu yerda amalga oshirilayotgan islohotlarni kuzatib boraman. Mamlakatda amalga oshirilayotgan islohotlar juda ishonchli va istiqbolli ko‘rinmoqda. Eng muhimi, ular davlat va xususiy sektor o‘rtasidagi hamkorlikni nazarda tutadi. Bu esa jamiyatning yangi ko‘rinishini shakllantirish va innovatsiyalarni rivojlantirishga xizmat qiladi.

Mintaqada sunʼiy intellekt sohasida sezilarli yutuqlar kuzatilmoqda. Ular qishloq xo‘jaligi, sanoat, logistika va transport kabi sohalarga tegishli. Biroq, bu tashabbuslarning global tizimga integratsiyalashuvi hali yetarli darajada rivojlanmagan. Aynan shu yerda xalqaro institutlar va milliy rahbariyatning roli muhim. Ular O‘zbekiston tajribasini dunyoga taqdim etishga va uni global kontekstga kiritishga yordam berishi mumkin.