ANQARA, 26-aprel. /“Dunyo” AA/. Anqara shahrida O‘zbekiston elchixonasi diplomatlari Turkiyada tahsil olayotgan o‘zbekistonlik talaba bilan uchrashuv o‘tkazdi, deb xabar bermoqda “Dunyo” AA muxbiri.

Uchrashuvda Prezident administratsiyasining Diniy-ma’rifiy masalalar bo‘yicha departamenti boshlig‘i Muzaffar Kamilov ham ishtirok etdi.

Muloqot davomida talabalar ta’lim jarayoni, madaniy hamkorlik va ijtimoiy qo‘llab-quvvatlash masalalari bo‘yicha o‘z fikr va takliflarini bildirdi.

Jumladan, O‘zbekistonda xalqaro darajada tan olinadigan madrasa tashkil etish taklifi ilgari surildi. Buni amalga oshirish uchun Islomshunoslik akademiyasi qoshida ilohiyot fakultetini ochish mumkinligi aytildi. Shu bilan birga, bunday loyihani boshlashdan oldin unga bo‘lgan ehtiyojni o‘rganish muhimligi ta’kidlandi.

Shuningdek, Turkiyadagi talabalar va diaspora vakillari uchun o‘zbek tilidagi kitoblar yetishmasligi muammosi ko‘tarildi. Bu milliy til va madaniyatni saqlash uchun bu yo‘nalishda aniq choralar ko‘rish zarurligini ko‘rsatadi.

Talabalar yana “Uzbekistan Airways” orqali parvozlar uchun maxsus chegirmalar joriy etishni taklif qilishdi. Bu ularning xarajatlarini kamaytirishga yordam beradi va O‘zbekiston bilan aloqalarni mustahkamlaydi.

Bundan tashqari, Anqarada madaniy markaz ochish taklifi ham bildirildi. Bu markaz madaniy tadbirlar o‘tkazish, diasporani birlashtirish va milliy qadriyatlarni targ‘ib qilishga xizmat qilishi mumkin.

Yana bir taklif sifatida Turkiya universitetlari bilan qo‘shma magistratura dasturlarini yo‘lga qo‘yish va xorijda bakalavrni tugatgan talabalarga O‘zbekistonda magistraturaga kirishda yengilliklar yaratish masalasi ko‘tarildi. Bu yuqori malakali kadrlar tayyorlash va ta’lim sohasidagi hamkorlikni kuchaytirishga yordam beradi.

Uchrashuvda ko‘tarilgan barcha masalalar xorijdagi o‘zbek talabalarini qo‘llab-quvvatlash, ularning sharoitlarini yaxshilash va O‘zbekiston bilan aloqalarni yanada mustahkamlashga qaratilgan.