KUALA-LUMPUR, 14-dekabr. /“Dunyo” AA/. Mamlakatimizning ilg‘or umumiy o‘rta taʼlim muassasalari direktorlari Malayziyaning UNIMAS universiteti akademiyasida taʼlim muassasasi menejmenti yo‘nalishida amaliyot o‘tadi, deb xabar qilmoqda “Dunyo” AA muxbiri.

Maktabgacha va maktab taʼlimi vazirligi bilan hamkorlikda tashkil etilgan “Taʼlimda yetakchilik va boshqaruv” mavzusidagi mazkur dastur o‘zbek maktablari direktorlarining boshqaruv, taʼlim sifati, pedagogik rahbarlik va taʼlim muassasasini strategik rivojlantirish bo‘yicha global tajriba hamda zamonaviy kompetensiyalarini oshirishga qaratildi.

Ikki hafta davom etgan malaka oshirish kurslarida o‘zbekistonlik maktab direktorlari resurslarni taqsimlash, loyihadan amaliyotga o‘tish tajribasi, maktab darajasida hisobdorlikni taʼminlash, taʼlimga innovatsiya va texnologiyani integratsiya qilish hamda rahbariyat va o‘qituvchi-talaba o‘rtasida sog‘lom munosabatlarni shakllantirish bo‘yicha yangi bilim va ko‘nikmalarga ega bo‘lishdi.

Jumladan, delegatsiya aʼzolarining Malayziya milliy universiteti qoshidagi davlat maktabi hamda Sunway International School xalqaro maktabiga tashriflari tashkil etilib, ushbu taʼlim muassasalari faoliyati bilan yaqindan tanishildi.

Amaliyot yakunida O‘zbekistonning Malayziyadagi elchixonasi ishtirokida o‘zbekistonlik taʼlim muassasalari rahbarlariga xalqaro miqyosda tan olingan sertifikatlar topshirildi.