ISLOMOBOD, 18-aprel. /«Dunyo» AA/. O‘zbekiston elchisi Alisher To‘xtayev Pokiston Oliy ta’lim komissiyasi raisi Niyoz Ahmad Axtar bilan uchrashuv o‘tkazdi, deb xabar bermoqda «Dunyo» AA muxbiri.

Muzokaralar chog‘ida tomonlar ta’lim sohasidagi ikki tomonlama hamkorlikni faollashtirish masalalarini muhokama qildilar. Bunda oliy darajadagi tashriflar doirasida erishilgan kelishuvlar ijrosiga alohida e’tibor qaratildi.

Uchrashuvda Pokiston tomoniga O‘zbekiston ta’lim tizimida oliy o‘quv yurtlarini modernizatsiya qilish va innovatsiyalarni rivojlantirishga qaratilgan keng ko‘lamli islohotlar haqida ma’lumot berildi. Hozirgi vaqtda O‘zbekistonda ko‘plab xorijlik talabalar, jumladan, pokistonlik yoshlar tahsil olmoqda, shuningdek, yetakchi xorijiy universitetlarning filiallari muvaffaqiyatli faoliyat yuritmoqda.

Doktor Niyoz Ahmad Axtar O‘zbekiston ta’lim sohasidagi o‘zgarishlarni yuqori baholadi va Pokiston tomoni akademik almashinuvlar hamda ilmiy-tadqiqot tashabbuslarini qo‘llab-quvvatlashga tayyor ekanini tasdiqladi.

Muloqot ishtirokchilari qo‘shma o‘quv dasturlarini joriy etish, talabalar va o‘qituvchilar mobilligini rivojlantirish, shuningdek, kadrlar malakasini oshirish masalalari yuzasidan fikr almashdilar. Ta’lim dasturlarini birgalikda akkreditatsiyadan o‘tkazish imkoniyati muhokamalarning alohida mavzusi bo‘ldi. Bu chora ta’lim sifati nazoratini kuchaytirishga va ikki davlat diplomlarining xalqaro miqyosda tan olinishini ta’minlashga xizmat qiladi.

Muzokaralar davomida Pokistonda Toshkent tibbiyot akademiyasi filialini tashkil etish jarayonini jadallashtirish masalasiga alohida e’tibor qaratildi. Tomonlar ushbu loyiha akademik hamkorlikni rivojlantirishda muhim qadam bo‘lishini, tibbiyot sohasida ilg‘or tajriba almashinuvini kengaytirishini va yoshlar ta’limi uchun yangi istiqbollar ochishini ta’kidladilar.

Uchrashuv yakunida O‘zbekiston va Pokiston o‘rtasidagi ta’lim sohasidagi aloqalarni sifat jihatidan yangi bosqichga olib chiqishga intilish qat’iy ekani tasdiqlandi.