XIROSIMA, 1 dekabr. / “Dunyo” AA/. Yaponiyaning Xirosima shahrida Namangan viloyati hokimligi, “Balcom” kompaniyasi va O‘zbekistonning Yaponiyadagi elchixonasi hamkorligida o‘zbek milliy taomlari restorani hamda viloyatning rasmiy “Savdo uyi” ochildi, deb xabar bermoqda “Dunyo” AA muxbiri Namangan viloyati hokimligi maʼlumotiga tayanib.

Mazkur muhim madaniy-iqtisodiy loyiha O‘zbekistonning Yaponiya bilan savdo, turizm va madaniy aloqalarini yana-da mustahkamlashga qaratilgan.

Yangi restoran yapon jamoatchiligiga o‘zbek milliy oshxonasining boy va betakror taʼmlarini tanitishni maqsad qiladi. Mehmonlarga palov, somsa, sho‘rva, lag‘mon, qozon-kabob va boshqa anʼanaviy taomlarni o‘zining asl texnologiyasida tayyorlangan holda taqdim etish rejalashtirilgan.

“Savdo uyi” esa Namanganda ishlab chiqarilayotgan sanoat va qishloq xo‘jaligi mahsulotlari, tekstil, hunarmandchilik va gastronomiya brendlari namoyishida muhim markaz hisoblanadi. Ushbu savdo uyi yapon bozoriga mahalliy mahsulotlarni yetkazib berish, yangi eksport yo‘nalishlarini yo‘lga qo‘yish, tadbirkorlar o‘rtasida to‘g‘ridan-to‘g‘ri hamkorlikni rivojlantirish uchun doimiy platforma vazifasini bajaradi.

Ushbu loyihalarning amalga oshirilishi Namangan viloyati brendini Yaponiya bozorida targ‘ib qilish, turizm oqimini oshirish va ikki davlat o‘rtasidagi iqtisodiy hamkorlikni yangi bosqichga olib chiqishga xizmat qiladi.

Tadbirlar Namangan viloyati hokimi Shavkatjon Abdurazzoqov boshchiligidagi delegatsiyaning Yaponiyaga tashrifi doirasida bo‘lib o‘tdi.