TOSHKENT, 17-iyul. /“Dunyo” AA/. AQSH, Kanada va Meksika yashil maydonlarida bo‘lib o‘tayotgan futbol bo‘yicha jahon chempionati o‘zining so‘nggi bosqichiga yetib keldi, deb xabar qilmoqda “Dunyo” AA muxbiri.

Bir oydan ziyod davom etgan musobaqada atigi ikki o‘yin qoldi: 19-iyul kuni Ispaniya va Argentina jahon chempionligi uchun maydonga tushsa, bir kun avval Fransiya hamda Angliya uchinchi o‘rin uchun bahs olib boradi.

Bu ikki uchrashuv nafaqat medallar taqdirini, balki bir qator shaxsiy sovrinlar, rekordlar va turnirning umumiy statistikasini ham belgilab beradi.

Eʼtiborlisi, jahon chempionatlari tarixida ilk bor finalda amaldagi Yevropa chempioni va “Copa America” g‘olibi o‘zaro to‘qnash keladi.

Ispaniya turnir davomida eng barqaror va taktik futbol namoyish etgan jamoalardan biri bo‘ldi. Ispanlar to‘p nazorati, yuqori pressing va tezkor hujumlari bilan raqiblarni qiyin ahvolga soldi.

Argentina esa katta turnirlardagi boy tajribasi va hal qiluvchi uchrashuvlarda bosimni yengib o‘tish qobiliyati bilan finalgacha yetib keldi. Jamoa himoyadan hujumga tez o‘tish va imkoniyatlardan samarali foydalanishda ajralib turdi.

Bu final yoshlik va tajribaning haqiqiy qarama-qarshiligi sifatida tarixga kirishi mumkin. Ispaniya tarkibida yosh yulduz Lamin Yamal turnirning eng yosh va eng yorqin kashfiyotlaridan biriga aylanishi mumkin. Uning driblingi, tezligi va kreativ harakatlari himoyachilar uchun jiddiy muammo bo‘lmoqda.

Argentina esa Lionel Messi boshchiligida ko‘plab qiyin va hal qiluvchi bahslarni o‘z foydasiga hal qildi. Janubiy Amerika vakillarining finallardagi ruhiy barqarorligi va bosimga chidamliligi asosiy ustunlik hisoblanadi. Shu bois, ushbu final nafaqat ikki jamoa, balki ikki avlod futboli o‘rtasidagi kurash sifatida ham katta qiziqish uyg‘otmoqda.

Final va uchinchi o‘rin uchun bahsning to‘purarlar poygasiga taʼsir qilishi o‘yinlarga qo‘shimcha intriga bag‘ishlaydi. Ispaniya, Argentina, Fransiya va Angliya futbolchilari yakuniy uchrashuvlardagi gollari bilan turnirning eng yaxshi to‘purariga aylanish imkoniyatini saqlab turibdi.

Xususan, Messi va Mbappeda 8 tadan, Keyn va Bellingemda 6 tadan, Dembele va Oyarsabalda 5 tadan gol bor. Ular oxirgi o‘yinlarda ham o‘zlarini ko‘rsatib, gollar seriyasini davom ettirsa, turnirning eng yaxshi futbolchisiga beriladigan “Oltin to‘p” (Golden Ball) sovrinini qo‘lga kiritish imkoniga ega bo‘ladi.

Ko‘pchilik uchinchi o‘rin uchun bahsni ahamiyatsiz deb hisoblaydi. Ammo bu o‘yin ingliz va fransuz futbolchilari uchun mavsumni medal bilan yakunlash, eng muhimi, yarim finaldagi mag‘lubiyatdan keyin muxlislar oldidagi ishonchni maʼlum maʼnoda tiklash imkoniyatidir.

Final o‘yinida esa qator tarixiy natijalar qayd etiladi. Ispaniya 16 yildan so‘ng navbatdagi, o‘zining ikkinchi jahon chempionligini qo‘lga kiritish imkoniyatiga ega. Argentina esa ketma-ket ikkinchi, o‘z tarixida to‘rtinchi mundial g‘olibligini nishonlashi mumkin.

23-jahon chempionligi uchun bahs 19-iyul yakshanba kuni, Toshkent vaqti bilan soat 23:55da Nyu-Yorkdagi “MetLife” stadionida boshlanadi. 3-o‘rin uchun o‘yin esa 18-iyul, shanbadan yakshanbaga o‘tar kechasi, soat 02:00da Mayamidagi “Hard Rock Stadium” stadionida bo‘lib o‘tadi.