SAMARQAND, 20-sentabr. /“Dunyo” AA/. Mamlakatimizda bo‘lib o‘tayotgan 46-Butunjahon shaxmat olimpiadasining 4-tur bahslari yakunlandi, deb xabar bermoqda “Dunyo” AA muxbiri.

O‘zbekiston-1 erkaklar terma jamoasi turning markaziy uchrashuvlaridan birida Turkiyani 2,5:1,5 hisobida mag‘lub etdi.

Nodirbek Yoqubboyev turkiyalik Vaxap Shanal ustidan g‘alaba qozongan bo‘lsa, Nodirbek Abdusattorov, Javohir Sindorov va Shamsiddin Vohidov bahslarni durang bilan yakunladi. O‘zbekiston-2 jamoasi Yangi Zelandiyani 2,5:1,5, O‘zbekiston-3 esa Yamanni 3,5:0,5 hisobida yengdi.

4-turdan so‘ng O‘zbekiston-1 bilan bir qatorda Xitoy, Armaniston, AQSh, Hindiston, Niderlandiya va Vengriya jamoalari ham 100 foizlik natija qayd etmoqda. O‘zbekiston-2 va O‘zbekiston-3 jamoalari ham 6 ochkodan jamg‘argan jamoalar safida.

Ayollar bahsida O‘zbekiston-1 Argentina terma jamoasini 3:1 hisobida yengdi. O‘zbekiston-2 Qirg‘izistonga 1:3 hisobida imkoniyatni boy bergan bo‘lsa, O‘zbekiston-3 Kuba jamoasiga 1,5:2,5 hisobida mag‘lub bo‘ldi.

Bugungi 5-turda O‘zbekiston-1 erkaklar jamoasi Vengriya, O‘zbekiston-2 Filippin, O‘zbekiston-3 Avstriya bilan kuch sinashadi. Ayollar bahsida esa O‘zbekiston-1 AQSh, O‘zbekiston-2 Tunis, O‘zbekiston-3 Madagaskar jamoalariga qarshi maydonga tushadi.

400 nafar erkaklar va ayollar jamoalari qatnashayotgan 46-Butunjahon shaxmat olimpiadasi o‘yinlari 11 ta turdan iborat bo‘lib, musobaqalar 27 sentyabrga qadar davom etadi.