TOSHKENT, 14-avgust. /“Dunyo” AA/. Oliy Majlis Senati raisi Tanzila Norboyeva bugun Toshkentda o‘tkazilgan “Mustaqil O‘zbekiston – 35 yillik taraqqiyot yo‘li: islohotlar, natijalar va istiqbollar” nomli xalqaro anjumanda nutq qildi, deb xabar bermoqda “Dunyo” AA muxbiri.

Senati Raisining taʼkidlashicha, mustaqillikning 35 yilligi nafaqat bosib o‘tilgan yo‘lni baholash, balki mamlakatning kelgusi taraqqiyoti uchun ustuvor yo‘nalishlarni belgilab olish imkonini beradi.

Qayd etilganidek, so‘nggi yillarda O‘zbekistonda davlat va jamiyat hayotining barcha sohasida keng ko‘lamli islohotlar amalga oshirildi. Ushbu o‘zgarishlar markazida inson, uning qadr-qimmati va manfaatlari turadi.

Tanzila Norboyeva asosiy yo‘nalishlar sifatida iqtisodiyotni liberallashtirish, kambag‘allikni qisqartirish, ijtimoiy himoyani kuchaytirish, taʼlim va sog‘liqni saqlash tizimlarini isloh qilish, tadbirkorlikni qo‘llab-quvvatlash hamda sud tizimini takomillashtirishni alohida sanab o‘tdi.

“Hozirgi kunda oldimizda turgan asosiy vazifa – barqaror iqtisodiy o‘sish surʼatlarini saqlab qolish va uning amaliy natijalarini har bir hudud, har bir tuman va har bir oila o‘z hayotida his etishini taʼminlashdir”, – deya taʼkidladi Senat raisi.

Nutqda parlamentarizmni rivojlantirishga alohida eʼtibor qaratildi. Yangi tahrirdagi Konstitutsiya davlat boshqaruvi tizimida parlamentning roli va masʼuliyatini oshirgani, qator vakolatlarning Prezidentdan parlamentga o‘tkazilishi hokimiyat tarmoqlari o‘rtasidagi muvozanatni yana-da mustahkamlashga xizmat qilmoqda.

Tanzila Norboyeva parlament samaradorligi qabul qilingan qonunlar yoki o‘tkazilgan tadbirlar soni bilan emas, balki ularning aholi hayotiga ko‘rsatayotgan amaliy taʼsiri bilan baholanishi lozimligini bildirdi. Shu munosabat bilan parlament faoliyatida urg‘u asta-sekin rasmiy nazoratdan yechimlarni birgalikda izlash va aniq natijalarga erishishga qarab siljimoqda.

Mahalliy Kengashlarning o‘rni alohida qayd etildi. Senat raisining so‘zlariga ko‘ra, yangi konstitutsiyaviy tuzum sharoitida ularning hududlarni rivojlantirish, byudjet ijrosini taʼminlash va aholini tashvishga solayotgan masalalarni hal etish borasidagi vakolatlari va masʼuliyati ortmoqda. Senat mahalliy Kengashlarni qo‘llab-quvvatlashni o‘z faoliyatining ustuvor yo‘nalishlaridan biri sifatida belgilagan.

Senat raisi xalqaro hamkorlik xususida so‘z yuritar ekan, O‘zbekistonning ochiq va pragmatik tashqi siyosati Markaziy Osiyoda o‘zaro ishonch va yaxshi qo‘shnichilik muhitini mustahkamlashga xizmat qilayotganini eʼtirof etdi. Uning fikricha, parlamentlararo hamkorlik mintaqaviy tashabbuslarni qo‘llab-quvvatlash, suv taʼminoti, energetika, transport, savdo va ekologiya masalalarini birgalikda hal etishda muhim o‘rin tutmoqda.

Shuningdek, u O‘zbekistonning xalqaro parlament muloqotida faol ishtirok etayotgani va mamlakat tashabbuslarini ilgari surayotganini taʼkidladi. Xususan, O‘zbekiston tashabbusi bilan BMT Bosh Assambleyasining 15 dan ortiq rezolyutsiyasi qabul qilingani, Parlamentlararo ittifoq va xorijiy davlatlar parlamentlari bilan o‘zaro munosabatlar kengayib borayotgani alohida qayd etildi.

Tanzila Norboyeva so‘zining yakunida taraqqiyotning yangi bosqichida turgan asosiy muammolar – sunʼiy intellekt va raqamli texnologiyalarning jadal joriy etilishi, iqlim o‘zgarishi, suv resurslari taqchilligi va global texnologik raqobatning kuchayishini sanab o‘tdi.

U sifatli iqtisodiy o‘sishni taʼminlash, yuqori daromadli ish o‘rinlarini yaratish, yoshlarda zamonaviy bilim va ko‘nikmalarni rivojlantirish, yangi texnologiyalarni joriy etish hamda hududlar o‘rtasidagi imkoniyatlar borasidagi nomutanosiblikni qisqartirish zarurligini taʼkidladi.